"Чарговы фэйк ад Telegram-каналаў. Пішуць, што "70 працэнтаў асабовага складу 103-й мабільнай брыгады з 18 ліпеня знаходзіцца ў Мінску. Будуць знаходзіцца і пасля выбараў. Ім аддадзены адпаведныя загады". Цяжка ўявіць, дзе можна схаваць больш за паўтары тысячы бравых дэсантнікаў (і гэта толькі з адной брыгады), а галоўнае - навошта іх хаваць?" - гаворыцца ў паведамленні Мінабароны.

Ваеннае ведамства раней інфармавала, што напярэдадні 90-годдзя паветрана-дэсантных войскаў у Мінск прыбудзе асабовы склад і тэхніка, якія будуць удзельнічаць у святочных мерапрыемствах. "Блакітныя берэты з Віцебска ў сталіцу таксама прыбылі, іх менш за батальён - цалкам дастаткова, каб выступіць на свяце 1 жніўня, - адзначылі ў Мінабароны. - Дарэчы, свята на Нямізе сілы спецыяльных аперацый арганізуюць не першы год, кожны раз - з прыцягненнем ваеннай тэхнікі. Праграма, вядома, будзе новай. Але на гэтым сенсацыі заканчваюцца".

У канале Мінабароны апублікаваны сённяшнія фота са 103-й Віцебскай асобнай гвардзейскай паветрана-дэсантнай брыгады. "Як бачыце, асабовы склад на месцы: займаецца баявой падрыхтоўкай, рыхтуецца да святкавання Дня дэсантнікаў і сіл спецыяльных аперацый, у разгары змена летняга лагера для цяжкіх падлеткаў на базе брыгады", - адзначана ў каментарыі.

З заўтрашняга дня ў віцебскіх дэсантнікаў шчыльны святочны графік: віншаванне ветэранаў ПДВ, урачыстае адкрыццё школы імя В.Маргелава, штогадовая дабрачынная паездка ў дзіцячы дом, сумесная акцыя з абласным раддомам і яшчэ мноства мерапрыемстваў.

"2 жніўня 103-я брыгада па традыцыі расчыніць дзверы для ўсіх жадаючых. Пераканацца, што віцебскія дэсантнікі на месцы, можна будзе нават асабіста", - падкрэслілі ў ведамстве.

28 ліпеня 2020, Мінск
БЕЛТА