Навасёлаў — двух жарабцоў і тры кабылы — запусцілі ў вальеры 6 красавіка. Яны прайшлі ветэрынарны кантроль. «Нягледзячы на перавозку, коні выглядаюць бадзёрымі і актыўнымі, хутка асвоіліся на новым месцы», — расказалі ў нацыянальным парку.

Тарпанападобныя коні — нашчадкі дзікіх лясных коней. Яны шмат у чым падобныя на сваіх продкаў: памерамі, мышастай афарбоўкай поўсці.

У Брэсцкай вобласці да гэтага дзікіх конікаў можна было сустрэць у рэспубліканскім біялагічным заказніку «Спораўскі». У канцы мінулага снежня 15 тарпанаў прывезлі, каб яны дапамаглі ў аднаўленні экасістэм поймавых лугоў. На каранціне яны прабылі крыху больш за месяц, а затым іх выпусцілі на вольны выпас ва ўгоддзі заказніка. У «Спораўскім» тарпанападобныя коні прынеслі ўжо прыплод.

Звязда, 8 красавіка 2024