У гэты дзень нарадзіўся выбітны класік беларускай літаратуры Якуб Колас. Якія яшчэ падзеі адбыліся 3 лістапада і чым азнаменаваны гэты дзень у народным календары, чытайце далей:

У 1927 годзе адбылася закладка ўніверсітэцкага гарадка у Мінску.

У 1961 годзе быў дэмантаваны помнік Сталіну ў Мінску.

У 1972 годзе ў Мінску адбылося адкрыццё помніка народнаму паэту Беларусі Якубу Коласу.

1702 год: Караль Карыцкі, доктар філасофіі, педагог, пісьменнік.

1882 год: Якуб Колас, беларускі празаік, паэт, педагог, навуковец, адзін з заснавальнікаў сучаснай беларускай літаратурнай мовы.

1890 год: Канстанцін Пушкарэвіч, філолаг, даследчык беларускай літаратуры, гісторык, перакладчык.

Таксама сёння нарадзіліся італьянскія скульптар і ювелір Бенвенута Чэліні і кампазітар Вінчэнца Беліні.

У гэты дзень Праваслаўная царква шануе памяць вялебнага Іларыёна Вялікага.

У гэты дзень людзі чакалі пахаладання, таму лічылася, што не варта адпраўляцца ў далёкі шлях. Калі на Іларыёна выпадаў снег, у наступным годзе чакалі добрага ўраджаю збожжа. Калі снег у гэты дзень выпаў і не растаў, увёсну будзе шмат пралесак.  

На бліжэйшы перыяд народны прагноз быў такі: калі дым уздымаецца роўна, надвор`е будзе добрым. Калі на ветках шмат снегу, снегапад будзе яшчэ некалькі дзён. Зорнае неба абяцала добрае, але марознае надвор`е.

Sputnik, 3 лістапада 2019