У гэты дзень у 1957 годзе нарадзіўся беларускі паэт Леанід Дранько-Майсюк. Якія яшчэ падзеі адбыліся 10 кастрычніка і чым азнаменаваны гэты дзень у народным календары, чытайце далей:

У 1702 годзе аблога Быхава, якая праводзілася казакамі і войскам ВКЛ у час Паўночнай вайны, скончылася капітуляцыяй гараджан.

У 1794 годзе ў баі пад Мацяёвіцамі быў цяжка паранены і трапіў ў расійскі палон Тадэвуш Касцюшка.

У 1939 годзе Вільня і частка Віленскай вобласці БССР перададзены Літве.

Хто нарадзіўся 10 кастрычніка

1796 год: Міхаіл Без-Карніловіч, беларускі гісторык, краязнавец, этнограф, вайсковы тапограф.

1957 год: Леанід Дранько-Майсюк, беларускі паэт.

Таксама сёння нарадзіліся французскі мастак Антуан Вато, італьянскі кампазітар Джузэпэ Вердзі і брытанскі драматург Гаральд Пінтэр.

У гэты дзень Праваслаўная царква ўспамінае вялебнага Савація Салавецкага. У народзе яго празвалі Савацеем Бортнікам або Пчаляром.

У гэты дзень падыходзіць да свайго завяршэння перыяд, у які рыхтавалі пчол да зімы. Вуллі прыбіралі ў імшанік і маліліся святому Савацію.

У вёсках кажуць: "З мёдам і долата праглынеш". Сапраўды, дзе яшчэ знойдзеш такі салодкі і карысны пачастунак, які добра захоўваецца і дадае асаблівы смак любой страве – хоць гарбаце, хоць блінам, хоць мясу? Пчаляроў вельмі шанавалі, бо лічылася, што працаваць з пчоламі можа толькі праведны чалавек.