Сёння святкуецца Міжнародны дзень грамадзянскай авіяцыі. Якія яшчэ падзеі адбыліся 7 снежня і чым адзначаны гэты дзень у народным календары, чытайце далей:

У 1550 годзе Барбара Радзівіл была каранавана ў Кракаве як каралева польская.

У 1921 па ініцыятыве Браніслава Тарашкевіча ў Радашковічах было заснавана Таварыства беларускай школы.

1878 год: Аляксандр Астрамовіч, беларускі каталіцкі святар, паэт.

1938 год: Васіль Сумараў, беларускі мастак.

Таксама сёння нарадзіліся амерыканскі лінгвіст Ноам Хомскі і нідэрландскі філосаф Йохан Хёйзінга.

У гэты дзень праваслаўныя вернікі шануюць памяць вялікапакутніцы Кацярыны Александрыйскай. Яна лічыцца заступніцай шлюбу.

У народзе святую называлі Кацярына-санніца. У вёсках ішлі Кацярынінскія гулянні, катанні на санках, кірмашы. Дзяўчыны ўвечары варажылі на нарачонага – рабілі салёную ляпешку і, з`еўшы яе, клаліся спаць, сказаўшы перад гэтым: "Нарачоны, падай вады". Таксама клалі пад падушку кавалак хлеба і запрашалі: "Нарачоны, прыходзь да мяне вячэраць". Раніцай дзяўчына глядзела: калі хлеб быў разламаны напалову, то хутка яна абярэцца шлюбам.

Пра надвор`е ў гэты дзень казалі: "Прыйшла Кацярына – прыйдзе і пярына". Калі 7 снежня ясна, зіма будзе марозная, а адліга або смуга прадракаюць моцнае пахаладанне.

Sputnik, 7 снежня 2024