Вечарам 10 красавіка ў Камянецкі РАУС з заявай аб невядомым знікненні малалетняга сына звярнулася 18-гадовая жыхарка вёскі Любашкі Камянецкага раёна. Пры гэтым дзяўчына паведаміла, што апошні раз бачыла дзіця каля свайго дома прыкладна ў 16.00 названага дня. Прынятыя меры па аператыўным пошуку дзіцяці выніку не далі.

Следчым упраўленнем УСК па Брэсцкай вобласці па факце знікнення без вестак дзіцяці распачатая крымінальная справа.

Цяпер працягваюцца пошукавыя мерапрыемствы, у якіх удзельнічаюць следчыя, а таксама супрацоўнікі Камянецкага РАУС, раённага аддзела па надзвычайных сітуацыях, дэпартамента аховы, добраахвотнікі.

Выкарыстоўваюцца магчымасці крыміналістычнай тэхнікі: квадракоптар, цеплавізары і іншае абсталяванне. Працу на месцы здарэння каардынуе кіраўніцтва УСК па Брэсцкай вобласці.

Знікламу Івану Валошыну ў маі споўніцца два гады. Ён са шматдзетнай сям`і, у якой чацвёра дзяцей.

Любашкі — вёска ў Брэсцкай вобласці за 20 кіламетраў ад Камянца, за 35 кіламетраў ад мяжы з Польшчай і ў лічаных кіламетрах ад Белавежскай пушчы.

Нагадаем, 16 верасня 2017 года пайшоў з дома і знік 10-гадовы жыхар вёскі Новы Двор Свіслацкага раёна Гродзенскай вобласці Максім Мархалюк. Вёска таксама знаходзіцца каля Белавежскай пушчы. Знайсці хлопчыка дагэтуль не ўдалося.

Аляксей Арэшка, БелаПАН
Мінск, 12 красавіка 2019