У Мінскім гарадскім судзе 27 чэрвеня завяршыўся працэс па справе аб жорсткім забойстве лёгкаатлеткі Юліі Балыкінай. Абвінавачаны ў забойстве Дзмітрый Вішталюк, былы блізкі сябар Балыкінай, прыгавораны да 23 гадоў пазбаўлення волі. Бацькі забітай прасілі суд прыгаварыць яго да вышэйшай меры пакарання.

Падсудны пазнаёміўся з вядомай спартсменкай ў інтэрнэце. Спачатку маладыя людзі мелі зносіны проста як сябры, пазней сталі жыць разам. Праз некалькі месяцаў паміж імі здарыўся сур`ёзны канфлікт — Дзмітрый не вярнуў Юліі грошы, якія ў яе пазычыў. Гэта паслужыла прычынай растання, але зносіны маладыя людзі працягнулі, Вішталюк рабіў рамонт у кватэры Балыкінай.

Трагедыя здарылася 28 кастрычніка 2015 года. Вішталюк спрабаваў паправіць нацяжны столь у ванным пакоі. Юлія, паводле яго слоў, пачала выстаўляць прэтэнзіі да якасці працы. Потым перайшла на асабістыя тэмы, завязалася сварка. У руках маладога чалавека быў малаток, якім ён нанёс спартсменцы некалькі удараў па галаве.

І хоць, паводле слоў Вішталюка, забойства ён не планаваў, наступныя тры дні ён разважаў, як схаваць цела і зняць з сябе падазрэнні. Спачатку Вішталюк пакінуў кватэру дзяўчыны, потым вярнуўся, каб забраць цела. На машыне забітай выехаў за межы Мінска і пакінуў аўтамабіль блізу чыгуначнай станцыі. На наступны дзень прыехаў туды, каб забраць цела і закапаць яго ў лесе.

Сямнаццаць дзён прадстаўнікі праваахоўных органаў пры дапамозе валанцёраў і вайскоўцаў шукалі зніклую дзяўчыну. Яе цела было знойдзенае ў Смалявіцкім раёне.

У першы дзень судовага працэсу Вішталюк звярнуўся да бацькі Балыкінай са словамі: "Я хачу папрасіць у вас прабачэння, хоць разумею, што гэта нельга дараваць". Аднак бацькі Балыкінай ў раскаянне абвінавачанага не вераць. Яны прасілі суд прыгаварыць Вішталюка да смяротнага пакарання, бо лічаць, што ён наўмысна здзейсніў жорсткае забойства — не здолеў змірыцца з тым, што Юлія разарвала з ім адносіны.

Пракурор запытвала для Вішталюка 23 гады пазбаўлення волі. У абвінавачанні акрамя эпізоду з забойствам адзначана, што падсудны выкраў з дома ахвяры каштоўныя рэчы і яе машыну.

Суд падтрымаў патрабаванні дзяржабвінаваўцы.

Прысуд пакуль не набыў законную моц і можа быць абскарджаны ў Вярхоўным судзе.

Адар`я Гуштын, БелаПАН
Мінск, 27 чэрвеня 2016