Паводле аператыўных звестак Міністэрства па надзвычайных сітуацыях, з прычыны парываў ветру (да 26 м/с) 17 чэрвеня пацярпелі Брэст, Гродна, Мінск і 38 населеных пунктаў у 28 раёнах Брэсцкай, Гродзенскай, Мінскай і Віцебскай абласцей.

Пашкоджаныя дахі 100 жылых дамоў, трох аб`ектаў сацкультбыту, аднаго вытворчага і 71 сельскагаспадарчага будынка. Аварыйнымі брыгадамі вядуцца аднаўленчыя работы.

У 16.10 ля дома № 16 па праспекце Пушкіна ў Мінску парывам ветру паваліла дрэва, якое ўпала на пенсіянера, ён шпіталізаваны. У 17.30 з-за падзення ліста шыферу з даху дома № 7 па вул. Сонечнай у Гродне атрымала траўму нагі жанчына, якая шпіталізаваная.

У 21.04 у вёсцы Ваўкалата Докшыцкага раёна Віцебскай вобласці з-за парываў ветру дрэва ўпала на аўтамабіль, які ехаў. Работнікі МНС распілавалі дрэва і выратавалі з аўтамабіля кіроўцу, у медыцынскай дапамозе ён патрэбы не меў.

Зафіксаваныя 184 выпадкі (Брэст — 40, Гродна — 126, Мінск — 18) падзення дрэў, у выніку якіх пашкоджаныя 20 легкавых аўтамабіляў (Гродна — 14, Брэст — 4, Мінск — 2) і аўтобус (Брэст). Работнікі МНС і іншых арганізацый праводзілі работы па распілоўванні ўборцы паваленых дрэў.

Парывы ветру таксама сталі прычынай падзення галін дрэў (шэсць выпадкаў у розных месцах) на чыгуначныя пуці ў Гродзенскай і Віцебскай абласцях. У выніку затрымліваўся рух (ад 9 хвілін да 2 гадзін) сямі пасажырскіх цягнікоў.

Паводле аператыўных даных з 6.00 17 чэрвеня да 6.00 18-га ў краіне былі абясточаныя 1.046 населеных пунктаў. Адключэнні аператыўна ліквідуюцца аварыйнымі брыгадамі. На 6.00 суботы заставаўся без электразабеспячэння 131 населены пункт.

Аляксей Арэшка, БелаПАН
Мінск, 18 чэрвеня 2016