Пры гэтым адзначана, што сітуацыя на ўнутраным валютным рынку характарызавалася фарміраваннем чыстай прапановы валюты.

Пераход Нацбанка да больш гнуткай курсавой палітыкі пры павышэнні ролі рынкавых механізмаў у курсаўтварэнні "дазволіў забяспечыць своечасовую рэакцыю абменнага курсу на змяненне знешніх умоў, перш за ўсё — дынамікі расійскага рубля, і спрыяў падтрыманню цэнавай канкурэнтаздольнасці беларускага экспарту", гаворыцца ў паведамленні па выніках пасяджэння праўлення.

На пасяджэнні праўлення таксама заяўлена, што Нацбанк ў 2016 годзе мае намер працягнуць курс на дэдаларызацыю эканомікі. У прыватнасці абяцаная "праца па ліквідацыі практыкі фарміравання тарыфаў і намінавання плацяжоў у замежнай валюце". "Паступова будуць рабіцца захады па адмове ад прывязкі да долара ЗША або еўра пры вызначэнні цэн, ставак па арэнднай плаце, мытных пошлін і іншых плацяжоў", — заяўляе рэгулятар.

Пры гэтым у Нацбанку рыхтуюцца да розных сцэнарыяў развіцця эканомікі і грашова-крэдытнай сферы з-за захавання "высокай нявызначанасці на сусветных фінансавых, сыравінных і таварных рынках, шырокага роскіду прагнозаў развіцця сітуацыі ў краінах — асноўных гандлёвых партнёрах Беларусі". "У гэтых умовах безумоўным прыярытэтам дзейнасці кожнага банка павінна стаць забеспячэнне ўстойлівасці свайго функцыянавання ў мэтах своечасовага і поўнага выканання ўсіх абавязацельстваў перад укладчыкамі і іншымі крэдыторамі", — падкрэслілі ў прэс-службе Нацбанка.

Нагадаем, за снежань 2015 года золатавалютныя рэзервы Рэспублікі Беларусь у вызначэнні стандарту МВФ скараціліся на 408,2 млн. долараў і на 1 студзеня 2016 года склалі 4 млрд. 175,8 млн. долараў ЗША ў эквіваленце. Пры гэтым у цэлым па выніках 2015 года ЗВР Беларусі ў вызначэнні МВФ скараціліся на 883,3 млн. долараў. У студзені 2016 года яны скараціліся яшчэ на 149 млн. долараў ЗША і, паводле папярэдніх даных, на 1 лютага склалі 4 млрд. 26,8 млн. долараў у эквіваленце.

Аляксей Аляксандраў, БелаПАН
Мінск, 18 лютага 2016