Нацыянальны банк Беларусі 20 лістапада выпусціў у абарачэнне памятныя манеты "Вушатая сава" серыі "Птушка года" (вушатая сава прызнаная ў Беларусі ў 2015 годзе Птушкай года): сярэбраную — наміналам 10 рублёў, масай 16,81 г, дыяметрам 32,00 мм, пробай сплаву 925, накладам 1.000 штук; медна-нікелевую — наміналам 1 рубель, масай 13,16 г, дыяметрам 32,00 мм, накладам 3.000 штук. 

Аверс: уверсе — рэльефная выява Дзяржаўнага герба Рэспублікі Беларусь, па крузе надпіс: РЭСПУБЛІКА БЕЛАРУСЬ; у цэнтры, у авале — малюнак птушаняці на стылізаваных далонях, пад ім справа — год чаканкі (на сярэбранай манеце — проба сплаву); унізе — намінал: 10 РУБЛЁЎ (на сярэбранай) і 1 РУБЕЛЬ (на медна-нікелевай). 

Рэверс: у цэнтры, на фоне авала, што сімвалізуе яйка, — рэльефная выява савы; па авале надпісы: злева — ПТУШКА ГОДА, справа — ВУШАТАЯ САВА. 

Манеты адчаканеныя на РДП "Казахстанскі манетны двор Нацыянальнага Банка Рэспублікі Казахстан". 

"Выпушчаныя ў абарачэнне манеты з`яўляюцца законным плацежным сродкам Рэспублікі Беларусь і абавязковыя да прыёму па намінальнай цане пры ўсіх відах плацяжоў без усякіх абмежаванняў", — гаворыцца ў паведамленні.

Аляксей Арэшка, БелаПАН
Мінск, 20 лістапада 2015