Больш за 396 тыс уладальнікаў украінскіх пашпартоў прыбылі ў Беларусь з 24 лютага 2022 года, паведамляе Дзяржпагранкамітэт рэспублікі.

Большая частка з 396 149 грамадзян Украіны ўехала транзітам праз Польшчу – больш за 296 тыс чалавек. На другім месцы – маршрут праз Літву (больш за 75,8 тыс). З боку Латвіі заехалі каля 7,8 тыс. Праз украінска-беларускую мяжу ўехалі каля 16 тыс чалавек.

Калі лічыць толькі з пачатку гэтага года, то ўсяго ў Беларусь уехалі амаль 28,8 тыс грамадзян Украіны. Як і раней, самы папулярны кірунак – польскі (звыш 22,8 тыс). Праз Літву прыехалі прыблізна 5,5 тыс, праз Латвію – 340 чалавек.

Некаторыя грамадзяне Украіны едуць з рэспублікі ў Расію самалётамі з Мінска, Магілёва, Брэста і Гомеля.

Дзяржпагранкамітэт не публікуе даныя аб тым, колькі грамадзян Украіны не прайшло фільтрацыю ў Шарамеццева і вярнулася ў аэрапорты вылету ў Беларусь. Раней крыніца ў сістэме грамадзянскай авіяцыі паведамляла, што такія выпадкі былі ў Брэсце і Мінску. У аэрапорты гэтых гарадоў вярталіся ўкраінскія грамадзяне, якія не прайшлі праверку ў Расіі.

Частка ўкраінскіх грамадзян, якія прыехалі ў Беларусь, застаюцца жыць у рэспубліцы. Некаторыя з іх атрымліваюць беларускія пашпарты ўказам прэзідэнта. Так, адзін з такіх указаў быў падпісаны ў канцы сакавіка бягучага года.

Мінск, 2 траўня 2025
Sputnik