А было ў гэтай ільготнай чарзе больш як 32 тысячы чалавек. Засталіся мнагадзетныя сем`і, тыя, хто больш як дзесяць гадоў жыве ў інтэрнаце, інваліды, малазабяспечаныя грамадзяне і г.д. Перад гарвыканкамам цяпер стаіць задача па прыцягненні для будаўніцтва сродкаў грамадзян у тым ліку за кошт крэдытаў, але не на льготных умовах.

Будаўніцтва арэнднага жылля ў Віцебску фінансуецца з абласнога бюджэту. У прыватнасці, на 2013 год запланавана каля 16-17 мільярдаў рублёў на будаўніцтва буйнапанэльнага дома (3 пад`езды, 120 кватэр) у новым так званым "спальным" мікрараёне абласнога цэнтра — Білева. Магчыма, у працэсе выканання бюджэту з`явяцца грошы на будаўніцтва яшчэ аднаго дома.

Хто можа жыць у арэндных кватэрах? ці вялікая чарга? колькі трэба плаціць? Аб усім гэтым можна атрымаць інфармацыю ў гарвыканкаме. Там вядзецца прыём заяў і ўлік. Адпаведная інфармацыя аб свабодным арэндным жыллі размешчана на афіцыйнай старонцы Віцебскага гарвыканкама ў інтэрнэце.

А ці насамрэч дорага абыдзецца жыць у арандаванай кватэры? Аказваецца, сёння ў сярэднім пражыванне ў арэнднай кватэры каштуе 500 тысяч рублёў, плюс, вядома, трэба аплачваць камунальныя паслугі. Паводле слоў спецыялістаў гарвыканкама, дагавор на арэнду жылля звычайна заключаецца на дзесяць гадоў.

Аляксандр Пукшанскі
Звязда, 10 студзеня 2013