Па факце дарожна-транспартнага здарэння, што адбылося вечарам 29 красавіка ў Мінску на 48-м кіламетры МКАД, Следчым упраўленнем Упраўлення Следчага камітэта Беларусі па Мінску распачата справа па ч. 3 арт. 317 КК (парушэнне правілаў дарожнага руху, што пацягнула па неасцярожнасці смерць дзвюх і больш асоб).

Нагадаем, 29 красавіка ў 21.05 43-гадовы мінчанін, кіруючы аўтамашынай "БМВ-525I", не справіўся з кіраваннем, выехаў за межы праезнай часткі і ўрэзаўся ў асвятляльную мачту. У выніку ДТЗ вадзіцель і яго пасажыр 29-гадовы грамадзянін Азербайджана (меў рэгістрацыю да 7 верасня 2012 года) ад атрыманых траўм памерлі на месцы здарэння.

Следствам праводзіцца комплекс дзеянняў, накіраваных на ўстанаўленне ўсіх абставінаў здарэння. У прыватнасці, прызначана аўтатэхнічная і судова-медыцынская экспертызы, вядзецца допыт сведак.

Паводле неафіцыйнай інфармацыі, пасажырам "БМВ" быў барэц Заур Ісмаілаў.

Як паведаміў тэлеканал "Беларусь 1", праз некалькі хвілін да месца здарэння прыехала каля 50 машын з прадстаўнікамі азербайджанскай дыяспары. Для падтрымання парадку быў выкліканы міліцэйскі спецназ.

У інтэрнэце з`явілася версія, што "БМВ" наладзіў гонкі з нейкай "Вольва".

Вячаслаў Будкевіч, БелаПАН
Мінск, 30 красавіка 2012

Ссылка на текущий документ: http://belarus.kz/aktueller/2-1/213/13902

Текущая дата: 30.11.2024