«Становішча на нашай паўднёвай граніцы досыць складанае. І яно змяняецца кожны дзень, прычым змяняецца не ў лепшы бок. У нас 1084 кіламетры дзяржаўнай граніцы з Украінай. Літаральна ў апошнія тыдні мы назіраем нічым не абгрунтаваную і пакуль незразумелую нам актыўнасць паблізу нашых граніц з боку Украіны», — распавёў начальнік Генеральнага штаба Узброеных Сіл — першы намеснік міністра абароны генерал-маёр Павел Муравейка. 

Як ён адзначыў, у населены пункт Оўруч на Ровенска-Жытомірскім напрамку прыбылі падраздзяленні спецыяльнага прызначэння 1-й прэзідэнцкай брыгады.

«Спецназ паблізу дзяржаўнай граніцы заўсёды насцярожвае. І гэта тыя аб’екты, якія фармуюць рэальныя выклікі, якія здольныя насыціць нашу тэрыторыю дыверсійна-разведвальнымі групамі, здольныя праводзіць правакацыі. Акрамя таго, мы бачым перамяшчэнне войскаў, перыядычныя палёты беспілотнікаў тыпу „Байрактар“ паблізу дзяржаўнай граніцы. Мы сутыкаемся з правакацыямі беспілотнай авіяцыі на тактычным узроўні: парушэннямі нашай дзяржаўнай граніцы. Мы бачым, што адбываецца мінаванне і нарошчванне інжынерных загарод», — адзначыў Павел Муравейка.

Ён падкрэсліў, што «мы вымушаныя перамяшчаць туды нашы падраздзяленні, уступаць ва ўзаемадзеянне з органамі пагранічнай службы, узмацняць асобныя кірункі і рыхтавацца да прыкрыцця, а таксама рухаць часам артылерыю для таго, каб своечасова быць здольнымі адрэагаваць».

Павел Муравейка адзначыў, што становішча на паўднёвых рубяжах няпростае.

«Я скажу, што сітуацыя няпростая. Калі пакуль відавочных правакацый, магутных, рэзанансных, не адбылося, то гэта толькі дзякуючы таму здароваму сэнсу, які маецца на ўсіх узроўнях камунікацыі і ўзаемадзеяння. Гэта і палітычныя дасягненні, гэта і пагранічнае ўзаемадзеянне, і дзеянні нашых падраздзяленняў, у тым ліку паблізу граніцы. Але рэальныя выклікі, умовы для таго, каб вырабіць нейкія маніпуляцыі, сёння выразна праглядаюцца. Мы гэта бачым, і мы трымаем руку на пульсе», — дадаў ён.

Звязда, 29 чэрвеня 2024