Праваахоўныя органы Беларусі, у першую чаргу МУС, загадзя рыхтаваліся да ўступлення ў сілу пастановы ўрада, што датычыцца Telegram-каналаў экстрэмісцкай накіраванасці, заявілі ў ГУБАЗіК.

Пастанова Саўміна № 575 "Аб мерах процідзеяння экстрэмізму і рэабілітацыі нацызму" ўступіла ў сілу на гэтым тыдні.

"Да гэтага часу мы практычна завяршылі работу па дэананімізацыі адміністратараў і найбольш актыўных падпісчыкаў экстрэмісцкіх телеграм-каналаў і чатаў. Дасканала задакументавалі ўсе размешчаныя ў сацыяльных сетках паведамленні, якія падахвочваюць да экстрэмісцкай дзейнасці, а таксама іншыя дзеянні інтэрнэт-карыстальнікаў па стварэнні пратэстнай актыўнасці", заявіў газеце "СБ. Беларусь Сегодня" начальнік аддзела ГУБАЗіК Вячаслаў Арлоўскі.

Паводле яго слоў, прынятыя меры дазволяць надаць увагу кожнаму падпісанту телеграм-каналаў і чатаў і даць ім прававую ацэнку.

У МУС таксама адзначылі, што пытанне прызнання групы грамадзян экстрэмісцкімі фармаваннямі знаходзіцца ў кампетэнцыі МУС ці КДБ, пры гэтым прадугледжана крымінальная адказнасць.

"Гэты парадак адрозніваецца ад прызнання інфармацыйнай прадукцыі экстрэмісцкімі матэрыяламі. У апошнім выпадку неабходна рашэнне суда, пры гэтым прадугледжана адміністрацыйная адказнасць", сказалі ў МУС.

У ГУБАЗіК адзначылі, што прыцягваць удзельнікаў экстрэмісцкіх фармаванняў да крымінальнай адказнасці будуць кропкава, з улікам ролі кожнага, абапіраючыся на сабраныя доказы.

"Стваральнікам, арганізатарам і ўдзельнікам прадугледжана пакаранне, пазбаўленне волі да 7 гадоў", - удакладнілі ў МУС. Там адзначылі, што да ўдзельнікаў экстрэмісцкіх фармаванняў могуць ставіцца і падпісанты телеграм-каналаў.

"Телеграм-канал можа прызнавацца як экстрэмісцкім матэрыялам, так экстрэмісцкім фармаваннем. Калі ў яго статус экстрэмісцкага фармавання, то яго падпісанты сапраўды могуць стаць фігурантамі крымінальных спраў", - сказаў Арлоўскі.

"Што тычыцца падпіскі на каналы, якія прызнаюцца экстрэмісцкімі матэрыяламі, то яна пакуль застаецца без пакарання. Але пры адной умове: калі падпісант не аказвае падтрымку ў папулярызацыі канала, гэта значыць не рэпосціць, не пералічвае грошай, не злівае туды інфармацыю. Калі пералічаныя дзеянні ёсць, тады падпісчыкі, адпаведна, прыцягваюцца да адміністрацыйнай адказнасці", - растлумачыў ён.

Прадстаўнік ГУБАЗіК таксама паведаміў, што людзям, якія з банальнай цікавасці чытаюць забаронены канал, прызнаны экстрэмісцкім матэрыялам, баяцца няма чаго.

"Ім варта адпісацца ад дадзенага рэсурсу і пытанняў да іх не ўзнікне", - папярэдзіў ён.

Даючы юрыдычную ацэнку экстрэмісцкім телеграм-каналам, праваахоўнікі пачнуць з іх адміністратараў, а таксама з актыўных прыхільнікаў рэсурсу - тых, хто зліваў туды інфармацыю, пералічваў грошы, рэпосціў публікацыі і іншым чынам іх папулярызаваў.

"Такіх карыстальнікаў адпіска ад рэсурсу ад адказнасці не вызваляе. Нават калі яны выдалілі інфармацыю - усюды застаецца электронны след", - папярэдзіў Арлоўскі.

Мінск, 16 кастрычніка 2021
Sputnik