Вячаслаў Гранько адзначыў, што «Беларусь досыць нядрэнна падрыхтавана ў плане ахопу вакцынацыяй супраць грыпу». На працягу некалькіх гадоў краіна дасягае рэкамендаванага СААЗ узроўню вакцынацыі. «Дзякуючы гэтаму мы можам выказаць здагадку, што вялікай эпідэміі грыпу ў нашай краіне не будзе», — сказаў ён.

Разам з тым каардынатар праграм СААЗ па інфекцыйных захворваннях Краінавага офіса заўважыў, што любая мікст-інфекцыя стварае дадатковыя складанасці ў плане лячэння. Таму Сусветная арганізацыя аховы здароўя настойліва рэкамендавала ў 2020 годзе прышчапляцца супраць грыпу, асабліва тым групам насельніцтва, у якіх высокая рызыка ўскладненняў як каранавіруснай інфекцыі, так і грыпу.

«Мы можам меркаваць, ёсць пэўныя дадзеныя: калі напластоўваюцца дзве інфекцыі, захворванне праходзіць цяжэй. Паколькі сімптомы сапраўды могуць быць падобныя (і грып, і COVID-19 — гэта рэспіраторныя інфекцыі), тут адзін шлях, каб іх адрозніць, — гэта тэставанне» , — дадаў ён.

Звязда, 29 студзеня 2021