Гэты дзень з`яўляецца сто сорак першым па грыгарыянскім календары, да канца года засталося 225 дзён.
Сёння адзначаецца Сусветны дзень метралогіі. Якія яшчэ падзеі адбыліся 20 траўня і чым адзначаны гэты дзень у народным календары, чытайце далей:
Гістарычныя падзеі 20 траўня
У 1962 годзе быў пушчаны Гомельскі тралейбус.
У 1980 годзе ў Мінску адкрыўся новы павільён Цэнтральнага (Камароўскага) рынку.
Хто нарадзіўся 20 траўня
1884 год: Канстанцін Алексютовіч, беларускі балетмайстэр.
1889 год: Генрых Грыгоніс, беларускі акцёр.
1902 год: Язэп Пушча, беларускі паэт, настаўнік, адзін з заснавальнікаў літаб`яднання "Узвышша".
Таксама сёння нарадзіліся французскі пісьменнік Анарэ дэ Бальзак і амерыканская актрыса і спявачка Шэр.
20 траўня ў народным календары
Сёння праваслаўныя вернікі святкуюць Успамін з`явы на небе Крыжа Гасподняга ў Іерусаліме. Гэта падзея адбылася ў Візантыі ў IV стагоддзі. Пасля смерці першага хрысціянскага імператара Канстанціна Вялікага царскі трон заняў яго сын Канстанцый. Ён упаў у ерась арыянства, і тады Гасподзь у Іерусаліме явіў цудоўны знак. 7 траўня 351 года (па старым стылі), у дзень Святой Пяцідзесятніцы, у тры гадзіны ночы на небе з`явілася выява Крыжа Гасподняга.
Таксама сёння шануюць памяць вялебнага Ніла Сорскага.
У гэты дзень прынята было купаць коней. Раніцай набіралі ваду ў вёдры і пакідалі яе грэцца на сонцы, а бліжэй да сярэдзіны дня аблівалі коней гэтай вадой.
Калі над ракой заўважылі ластавак, якія высока лятаюць, надвор`е яшчэ доўга будзе цёплае і сонечнае.
Sputnik, 20 траўня 2024
Ссылка на текущий документ: http://belarus.kz/aktueller/2-3/1/74201
Текущая дата: 08.09.2024