«Сёння наш цудоўны горад Ліда адзначае 701-ы год нараджэння. Гарады з гадамі становяцца старэйшымі, а наш горад яшчэ і прыгажэйшым, больш дагледжаным. Кожны жыхар нашага горада рыхтаваўся да свята, наводзіў парадак у сябе і не толькі. Мы любім прымаць гасцей», — адзначыў старшыня Лідскага райвыканкама Сяргей Ложачнік.

Кіраўнік Лідскага райвыканкама абазначыў моманты, якімі лідчане па праве могуць ганарыцца, што гаворыць аб нястомным развіцці райцэнтра. «Літаральна ўчора мы адкрылі частку аб’язной дарогі вакол горада, доўгачаканы ўчастак, які разгрузіць Ліду ад транзітнага транспарту, палепшыць экалагічную абстаноўку, бяспеку. На сённяшні дзень пабудавана шэсць дамоў шматпавярховых. Гэта тое, што было запланавана на гэты год. Мы працягваем рыхтаваць памяшканні пад падлетак. Размяшчэнне МРТ, ангіёграф у нашай цэнтральнай раённай бальніцы. Мы добра ўклаліся ў сацыяльную сферу, адукацыю, культуру, спорт.

Свята горада праходзіць пад дэвізам «У Лідзе ўсё ў лепшым выглядзе!» Тэматычныя лакацыі арганізаваны ў розных кутках горада. Напрыклад, шэсць вядучых харчовых прадпрыемстваў Лідскага раёна ў рамках гастранамічнага фестывалю «Харч-фэст» падрыхтавалі на сваіх пляцоўках забаўляльныя мерапрыемствы, дэгустацыю сваёй прадукцыі і розыгрыш прызоў. Каля сцен Лідскага замка разгарнуліся дэгустацыя сярэднявечнай кухні, майстар-класы сярэднявечных танцаў, праходзяць рыцарскія конныя турніры. На пляцоўцы каля школы мастацтваў адкрыта выстава прамысловых прадпрыемстваў раёна. Фінальным акордам урачыстых мерапрыемстваў стане выступленне Вольгі Бузавай.

«Дзень нараджэння горада — добрае свята. І яго варта адзначаць. Я віншую ўсіх лідчан з Днём горада, дзякую арганізатарам. Хочацца, каб у кожнага гараджаніна і госця быў добры настрой, каб яны павезлі часцінку кахання да Ліды з сабой, каб захацелася сюды яшчэ раз вярнуцца», — сказаў на заканчэнне Сяргей Ложачнік.

Звязда, 31 жніўня 2024