Экспазіцыя сфармавана з сапраўдных матэрыялаў розных фондавых калекцый музея-вексілалогіі, тканін і адзення, тэхнічных сродкаў і прыстасаванняў, фалерыстыкі, жывапісу, фотадакументаў і іншых. Сярод прадстаўленых прадметаў ёсць унікальныя, некаторыя з іх экспануюцца ўпершыню.

Да рарытэтаў адносяцца сапраўдныя транспаранты арганізацый Камуністычнай партыі Заходняй Беларусі (КПЗБ) і камуністычнага саюза моладзі Заходняй Беларусі (КСМЗБ), з якімі ў 1920-1930-я гады працоўныя выходзілі на мітынгі і дэманстрацыі. Прадстаўлены ўнікальныя ўлёткі ЦК КПЗБ і ЦК КСМЗБ, выдадзеныя ў падпольнай друкарні ў Брэсце-над-Бугам.

Асаблівае месца ў калекцыях абласнога музея займаюць мемарыяльныя рэчы, якія належалі землякам — актыўным удзельнікам рэвалюцыйнага руху ў Заходняй Беларусі, членам КПЗБ і КСМЗБ Мірону Крыштафовічу, Захару Паплаўскаму, Васілісе Селівонік, Васілю Ласковічу. Гэта сапраўдныя дакументы і фатаграфіі, узнагароды, кнігі з аўтографамі, стужкі «Ганаровы грамадзянін г. Брэста», асабістыя рэчы.

На выставе таксама прадстаўлены зборнік вершаў, компас і галаўны ўбор члена Беларускай сялянска-працоўнай грамады (БКРГ) і Таварыства беларускай школы (ТБШ) беларускага паэта Міколы Засіма. Дапаўняюць экспазіцыю жывапісныя работы члена Саюза мастакоў БССР Васіля Шыкіна «Цяжкая доля», «Зімовы вечар», «1939 г. Заходняя Беларусь», «Успамін дзяцінства».

Звязда, 15 верасня 2021