"Сярод насельніцтва існуе памылковае меркаванне, што выпальванне сухой расліннасці садзейнічае яе лепшаму росту. На самай справе гэта сапраўднае экалагічнае бедства, як і сельскагаспадарчыя выпальванні. У адпаведнасці з законам "Аб раслінным свеце" выпальванне сухой расліннасці і яе астаткаў забараняецца", - падкрэслілі у Мінпрыроды.

Пры выпальванні сухой травы збядняецца глеба, мінеральныя рэчывы, што ў попеле, хутка выветрываюцца і вымываюцца з грунтавымі водамі. Збядняецца відавы склад расліннасці, гінуць насякомыя, жабы, згараюць гнёзды відаў птушак, якія гняздуюцца на зямлі: кнігаўкі, палявога і ляснога жаваранкаў, звычайнай аўсянкі, бакаса.

"Пры вельмі частых пажарах згарае не толькі сухая трава, але і назапашаная ў глебе мёртвая арганіка. Адпаведна, павялічваюцца выкіды вуглякіслага газу, а значыць, узмацняецца так званы парніковы эфект, які прыводзіць да неспрыяльных змяненняў і больш рэзкіх ваганняў клімату", - звярнулі ўвагу ў міністэрстве.

Дым ад спальвання сухой расліннасці вельмі небяспечны для алергікаў. У залежах сухой травы і буралому часта знаходзяцца адходы, што выдзяляюць пры спальванні рэчывы, якія атручваюць жывыя арганізмы. Напрыклад, у дыме, які ўтвараецца пры плаўленні ПВХ-пластыку, абрэзкаў лінолеума, пластыкавых бутэлек, цыраты, цацак, вёдраў, да 75 працэнтаў шкодных рэчываў.

Выпальванні часта прыводзяць да ўзгарання тарфянікаў і лясоў. Штогод 10-12 працэнтаў лясных пажараў узнікае па прычыне веснавых выпальванняў. Акрамя экалагічных чалавек нясе эканамічныя страты ад недавыкарыстання драўніны, дзікарослых грыбоў і ягад, а таксама расходы на тушэнне пажараў.

У адпаведнасці з Кодэксам аб адміністрацыйных правапарушэннях за незаконнае выпальванне сухой расліннасці, траў на корані, а таксама ржышча і паржышчавых астаткаў на палях або непрыняцце мер па ліквідацыі выпальванняў вінаватыя асобы прыцягваюцца да адміністрацыйнай адказнасці ў выглядзе штрафу ў памеры ад 10 да 40 базавых велічынь (1 БВ складае Br27). За развядзенне вогнішчаў у забароненых месцах прадугледжана папярэджанне або штраф у памеры да 12 базавых.

Акрамя таго, за незаконнае выпальванне сухой расліннасці, траў на корані, іржышча і паржышчавых астаткаў юрыдычныя і фізічныя асобы кампенсуюць шкоду, прычыненую навакольнаму асяроддзю. Яе памер вызначаецца па таксах, зацверджаных указам нумар 348 ад 24 чэрвеня 2008 года.

4 красавіка 2020, Мінск
БЕЛТА