Удзельнікамі мерапрыемства сталі 25 беларусаў, якім споўнілася 14 гадоў. Яны прыехалі ў сталіцу напярэдадні з розных рэгіёнаў краіны. Нягледзячы на юны ўзрост, яны ўжо дасягнулі пэўных поспехаў у вучобе, праявілі неардынарныя здольнасці ў творчых конкурсах, алімпіядах, спартыўных спаборніцтвах.

Аляксандр Лукашэнка асабіста ўручыў кожнаму навучэнцу пашпарт, адзначыўшы, што атрыманне гэтага дакумента ва ўсе часы ўспрымалася як першы крок у дарослае жыццё.

"Ведаю, што вы ўжо дабіліся пэўных поспехаў у вучобе, спорце, грамадскіх справах. Гэта цудоўна, вы проста малайцы, - падкрэсліў Прэзідэнт. - Я ўпэўнены: самыя вялікія перамогі ў вас яшчэ наперадзе. Пры гэтым дзяржава паклапацілася, каб перад вамі былі адкрыты ўсе дарогі. І толькі ад асабістай мэтанакіраванасці, упартасці і працавітасці залежыць, якіх вышынь вы і вашы равеснікі зможаце дасягнуць у будучым".

Кіраўнік дзяржавы падкрэсліў, што ўсе, хто сёння трапіў у Палац Незалежнасці, дабіліся гэтай магчымасці сваімі поспехамі. "Тут няма выпадковых людзей. Тут людзі, якія ўмеюць працаваць і паказваць прыклад іншым, весці за сабой", - сказаў ён.

Прэзідэнт адзначыў, што папярэднія пакаленні зрабілі ўсё, каб моладзь магла ганарыцца сваёй краінай. "Цяпер ваша чарга развіваць, праслаўляць і абавязкова ў будучым, ды і цяпер, абараняць Беларусь, - сказаў ён. - Магчыма, вы яшчэ не задумваецеся аб такіх важных і складаных паняццях, як самаідэнтычнасць нацыі або незалежнасць дзяржавы. Але, толькі з`явіўшыся на свет, вы ўжо сталі часткай беларускага народа, тварцамі яго сучаснага і, вядома ж, будучага. Усвядоміўшы гэта, вы зусім па-іншаму прачытаеце першыя словы Канстытуцыі: "Мы, народ Беларусі". Бо народ - мы ўсе, хто жыве, хто жыў да нас і будзе жыць пасля нас на гэтай зямлі. Таму мы адзіныя, і ад кожнага залежыць, якой наша краіна будзе заўтра".

Аляксандр Лукашэнка ўпэўнены, што незалежна ад выбранай прафесіі галоўнае прызначэнне грамадзяніна - служыць Айчыне. "Патрыятызм - не проста размовы аб тым, як мы любім Радзіму (хоць і гаварыць аб гэтым трэба). Гэта штодзённая праца на яе карысць, захаванне гістарычных, культурных традыцый, абарона інтарэсаў дзяржавы і жыцця людзей. Усё гэта каштоўнасці, якія нашым продкам даводзілася адстойваць са зброяй у руках", - падкрэсліў Аляксандр Лукашэнка. Ён нагадаў пра гераічны подзвіг тых, хто 75 гадоў таму адваяваў для беларусаў права на існаванне, разграміўшы фашызм. "Яны захавалі ўсім нам жыццё і свабоду. Я ўпэўнены, што гэту спадчыну вы будзеце берагчы гэтак жа, як і мы", - сказаў беларускі лідар.

"У вашай асобе бачу новую, пазітыўную, таленавітую і па-добраму амбіцыйную Беларусь. Гэта мяне радуе, як і ўсіх вашых бацькоў. Ідзіце наперад да выбранай мэты, ніколі не здавайцеся і, самае галоўнае, ніколі нічога і нікога не бойцеся. Верце ў сябе, верце, што калі вы ідзяце наперад, то вам абавязкова дапамогуць і, як правіла, на вашай роднай зямлі, у вашай Беларусі", - звярнуўся да маладых грамадзян краіны Прэзідэнт.

Навучэнец гімназіі Быхава Дзмітрый Іваноў у час цырымоніі адзначыў, што вельмі рады быць удзельнікам урачыстага мерапрыемства. Ён расказаў, што з`яўляецца карэспандэнтам гімназічнай газеты, папрасіў зрабіць агульны здымак з Прэзідэнтам і паабяцаў перадаць кіраўніку дзяржавы новы нумар выдання.

Усе ўдзельнікі мерапрыемства атрымалі ў падарунак ад кіраўніка дзяржавы кнігу "Я - грамадзянін Рэспублікі Беларусь", наборы прысмакаў, а таксама каштоўныя наказы. "Будзьце журналістамі, артыстамі, інжынерамі, аграномамі - усё нам патрэбна будзе ў гэтым жыцці ў нашай краіне. Поспехаў вам, і галоўнае - будзьце шчаслівымі. Не спяшайцеся выбіраць прафесію, прыглядайцеся, у вас яшчэ ёсць час. А то будзе, як у мяне: паспяшаешся, а потым давядзецца дадаткова вучыцца", - параіў Аляксандр Лукашэнка.

Пасля ўрачыстай цырымоніі навучэнцы пабывалі на экскурсіі ў залах Палаца Незалежнасці, наведалі спецыяльны музей, дзе выстаўлены разнастайныя падарункі, паднесеныя Прэзідэнту Беларусі кіраўнікамі іншых дзяржаў і замежных дэлегацый, вядомымі дзеячамі розных сфер.

Цырымонія ўручэння пашпартоў Прэзідэнтам у Палацы Незалежнасці была арганізавана напярэдадні Дня Канстытуцыі, які адзначаецца ў Беларусі 15 сакавіка.

Першае такое мерапрыемства адбылося ў мінулым годзе, які быў юбілейным для асноўнага закона краіны - 15 сакавіка 2019 года адзначалася 25 гадоў з дня прыняцця Канстытуцыі Рэспублікі Беларусь.

10 сакавіка 2020, Мінск
Кацярына Крышэнік - БЕЛТА