Прэзэнтацыя ладзілася для тых, хто ахвяраваў на выданьне праз сайт Talaka.by, дзе патрэбную на выданьне суму ў 2 тысячы рублёў сабралі за два дні.

«Вельмі важна бараніць сваё права на мову, бо беларуская мова — гэта адзіная каштоўнасьць, якая адрозьнівае нас ад астатніх народаў, — тлумачыць Ігар Случак. — Цяпер мы маем сытуацыю, калі збольшага беларуская мова дзяржаўная толькі на паперы».

Дапаможнік кішэннага фармату зьмяшчае на 60 старонках вытрымкі з заканадаўства, узоры зваротаў, парады і інструкцыі на розныя выпадкі — напрыклад, калі чалавека абразілі за ўжываньне беларускай мовы або калі не хапае нейкага дакумэнту па-беларуску.

Аўтары кажуць, што кніга ня ёсьць інструкцыяй у тым, як «стаць моўным інспэктарам», а прызначана для звычайных беларусаў, якія хочуць абараніць законныя правы. Але парады прыдатныя і для патрабаваньняў выконваць законы ад самых высокіх інстанцыяў.

«Нашая мэта — каб правы беларускамоўных былі абароненыя ва ўсіх сфэрах, — кажа Аліна Нагорная. — Вось, напрыклад, цяпер створаная пэтыцыя „За беларускую мову на этыкетках“. Калі зьмены, прапісаныя ў пэтыцыі, будуць прынятыя ў заканадаўства, беларускай мовы вакол нас адразу стане нашмат больш. Таму запрашаем далучацца да пэтыцыі і ўвогуле да дзейнасьці „Умовы для мовы“».

Каб паказаць, як выглядае такая дзейнасьць, Случак выставіў стэнд з адказамі, атрыманымі на ягоныя пісьмовыя звароты ад розных кампаніяў і інстанцыяў: ад вытворцы чыпсаў «Анега» і футбольнага клюбу БАТЭ да дэпутатаў Палаты прадстаўнікоў і Канстытуцыйнага суду.

Пазьней прэзэнтацыі дапаможніка «Абаронім мову» адбудуцца ў Баранавічах (ужо вядомая дата — 24 кастрычніка на курсах «Мова Нанова»), Браславе, Горадні, Салігорску, Слуцку і паўторна ў Менску. Прэзэнтацыі ўжо будуць адкрытымі.

Аўтары плянуюць празь нейкі час стварыць сайт на тэму абароны беларускай мовы, выкласьці там дапаможнік для вольнага спампоўваньня.

Радыё Свабода, 10 кастрычніка 2018