Урачыстыя мерапрыемствы з нагоды юбілею Нацыянальнага гістарычнага архіва Беларусі адбудуцца 28-29 чэрвеня. Навукова-практычная канферэнцыя "Беларускія архівы на мяжы тысячагоддзяў: здабыткі і страты" з удзелам вучоных, якія займаюцца вывучэннем пытанняў гісторыі, крыніцазнаўства, археаграфіі, генеалогіі і іншых спецыяльных гістарычных дысцыплін, пройдзе 28 чэрвеня.

У час канферэнцыі адбудзецца прэзентацыя ілюстраванага навуковага выдання-альбома "Для лепшое твердости…": пергаментныя дакументы перыяду Вялікага княства Літоўскага з фондаў Нацыянальнага гістарычнага архіва Беларусі (1391-1566 гг.)".

Канферэнцыя пройдзе ў будынку Інстытута гісторыі НАН Беларусі.

У Мінскай гарадской ратушы 29 чэрвеня адкрыецца выстаўка "Менск: архівы старога горада", на якой увазе шырокай грамадскасці будуць прадстаўлены арыгіналы актавых кніг Менскага (Мінскага) магістрата другой палавіны XVII стагоддзя са збору архіва.

Нацыянальны гістарычны архіў Беларусі - самае вялікае ў краіне сховішча рукапіснай спадчыны перыяду XIV - пачатку ХХ стагоддзя.

У яго фондах знаходзяцца ўнікальныя дакументы, якія асвятляюць разнастайныя бакі жыцця насельніцтва Беларусі і суседніх краін.

Адлік сваёй сучаснай гісторыі архіў вядзе з 5 ліпеня 1938 года, калі Магілёўскі гістарычны архіў быў рэарганізаваны ў Цэнтральны гістарычны архіў. У архіве налічваецца 3 тыс. 157 фондаў, якія ўключаюць 1 млн 22 тыс. 165 спраў. Найбольш каштоўныя дакументы - пергаментныя граматы, а таксама актавыя кнігі дзяржаўных устаноў Вялікага Княства Літоўскага і Рэчы Паспалітай.

Прадстаўлены і фамільныя фонды, сярод якіх дакументы каралеўскай сям`і Сабескіх, графскага роду Плятэр-Зібергаў, князёў Любамірскіх і Радзівілаў. Архіў роду Радзівілаў, значная частка якога ёсць у НГАБ, у 2009 годзе быў уключаны ў рэестр дакументальнай спадчыны ЮНЕСКА "Памяць свету".

28 чэрвеня 2018, Мінск
БЕЛТА