Адрэстаўраваную ваенную драму рэжысёра Элема Клімава па сцэнарыі Алеся Адамовіча "Ідзі і глядзі" ("Беларусьфільм", "Масфільм", 1985 год) пакажуць 19 сакавіка ў Доме кіно ў Мінску да 75-годдзя трагедыі Хатыні. 

Карціна была адрэстаўравана спецыялістамі кінаканцэрна "Масфільм" і ў 2017 годзе атрымала галоўны прыз на 74-м Венецыянскім кінафестывалі ў намінацыі "Венецыянская класіка" за лепшы адрэстаўраваны фільм.

Прэм`ера фільма "Ідзі і глядзі" адбылася летам 1985 года на Маскоўскім міжнародным кінафестывалі, дзе ён быў удастоены "Залатога прыза" і адзначаны прэміяй FIPRESCI.

За больш як 30 гадоў з моманту стварэння фільм станавіўся лаўрэатам многіх прэстыжных кінафестываляў.

У 1985 годзе быў вылучаны ад СССР у лік прэтэндэнтаў на прэмію "Оскар" у намінацыі "Лепшы фільм на замежнай мове". Паводле даных апытання чытачоў часопіса "Советский экран", "Ідзі і глядзі" быў прызнаны лепшым фільмам 1986 года, а пасля замацаваўся ў многіх кінарэйтынгах, у тым ліку і замежных.

Фільм мае рэйтынг 95 працэнтаў "свежасці" па шкале Rotten Tomatoes. Па версіі часопіса Time Out, карціна займае шосты радок у спісе "50 лепшых ваенных фільмаў усіх часоў", адначасова з`яўляючыся лепшым фільмам пра Другую сусветную вайну. У 2008 годзе брытанскі часопіс Empire ўключыў стужку ў спіс "500 найвялікшых фільмаў усіх часоў".

Па выніках апытання, праведзенага ў 2012 годзе брытанскім часопісам Sight & Sound сярод рэжысёраў, карціна заняла 30-е месца ў спісе лепшых фільмаў усіх часоў.

Паказ стане сумеснай акцыяй Нацыянальнай кінастудыі "Беларусьфільм" і кінаканцэрна "Масфільм" пры падтрымцы Беларускага саюза кінематаграфістаў. Білеты можна набыць у касах Дома кіно. Пачатак а 16.00.

16 сакавіка 2018, Мінск
БЕЛТА