17 ліпеня ў Валожынскім раёне пачынае працу летні моладзевы лагер "Вывучай. Дзейнічай. Падзяліся". Адкрыццё лагера прымеркаванае да Сусветнага дня барацьбы з гандлем людзьмі, які адзначаецца 30 ліпеня.

У цырымоніі адкрыцця возьмуць удзел прадстаўнікі Міністэрства ўнутраных спраў Беларусі, Міжнароднай арганізацыі па міграцыі, ЮНЭЙДС, ЮНІСЕФ, ПРААН, іншых агенцтваў ААН і Агенцтва ЗША па міжнародным развіцці.

Мэта летняга моладзевага лагера — навучыць будучых лідараў думкі, якія ў далейшым змогуць данесці веды да сваіх аднагодкаў і натхніць іх зрабіць свой унёсак у барацьбу з трафікінгам.

На працягу пяці дзён 18 актыўных маладых людзей з розных рэгіёнаў Беларусі ў гульнёвай і інтэрактыўнай форме будуць абмяркоўваць пытанні бяспечнай міграцыі і процідзеяння гандлю людзьмі. Не застануцца без увагі тэмы гендарнай роўнасці, ВІЧ/СНІД, хатняга насілля.

Акрамя таго, удзельнікі змогуць палепшыць свае камунікатыўныя і лідарскія навыкі, пройдуць навучанне ў "Школе відэаблогера" і "Майстэрні сацыяльнага кіно", павысяць кампетэнтнасць у сферы інтэрнэт-бяспекі.

Авалодваць новымі ведамі і ўменнямі хлопцам дапамогуць запрошаныя эксперты і трэнеры па пытаннях міграцыі, процідзеяння гандлю людзьмі, прафесійнага развіцця, прадстаўнікі паспяховых кампаній і грамадскіх арганізацый, а таксама медыйныя персоны.

Ініцыятыва з`яўляецца працягам інфармацыйнай кампаніі "МАМ-ІКС: Спыні гандаль людзьмі", якая была запушчаная ў Беларусі ў 2016 годзе напярэдадні Сусветнага дня барацьбы з гандлем людзьмі.

Вячаслаў Будкевіч, БелаПАН
Мінск, 17 ліпеня 2017