Выстава карцін "Лічбы на сэрцы" Героя Беларусі, народнага мастака СССР, народнага мастака Беларусі, удзельніка Вялікай Айчыннай вайны Міхаіла Савіцкага 28 ліпеня адкрыецца ў Беларускім дзяржаўным музеі гісторыі Вялікай Айчыннай вайны.

Міхаіл Савіцкі нарадзіўся ў вёсцы Звенячы Талачынскага раёна Віцебскай вобласці ў сялянскай сям`і. Калі пачалася Вялікая Айчынная вайна, ён праходзіў тэрміновую службу ў радах Чырвонай Арміі. Разам з легендарнымі абаронцамі Севастопаля змагаўся да ліпеня 1942 года. Потым - палон і кругі пекла ў канцлагерах Дзюсельдорфа, Бухенвальда.

Міхаіл Савіцкі быў вызвалены з канцлагера Дахау амерыканскімі войскамі 29 красавіка 1945 года. Вязня нумар 32815 знайшлі без прытомнасці. Пасля лячэння і праверак у фільтрацыйным лагеры НКУС Міхаіл Савіцкі прадоўжыў службу ў 6-й гвардзейскай зенітна-артылерыйскай дывізіі мастаком-афарміцелем.

У 1946 годзе ён быў дэмабілізаваны і, вярнуўшыся ў Беларусь, паступіў у Мінскае мастацкае вучылішча. Пазней вучыўся ў Маскоўскім мастацкім інстытуце імя В.І. Сурыкава, які скончыў у 1957 годзе. Серыя з 16 карцін "Лічбы на сэрцы" (1974-1979,1987) знамянуе сабой асаблівы этап у творчасці мастака.

Палотны раскрываюць гледачу злавеснае аблічча фашызму і адначасова сцвярджаюць бессмяротнасць непакоранага чалавека.

Сам мастак так апісаў мэту стварэння карцін: "Я не мог не напісаць гэту серыю. Па-першае, дзеля моладзі, якая нарадзілася пасля вайны. Жывапіс, на мой погляд, можа раскрыць глыбокі трагізм вайны, уздзейнічаючы на чалавека выключна праз сэрца, эмоцыі і душэўнае сузіранне. Зразумела, вярнуцца, хаця б у думках, у той жудасны час было вельмі няпроста. Трэба было яшчэ раз перажыць мінулае, добраахвотна вярнуцца туды, у самае дно пекла. Здароўе, надламанае вайной, таксама супраціўлялася. Часам так мучыла язва, што рука не магла трымаць пэндзаль..."

Выстава "Лічбы на сэрцы" будзе экспанавацца да 9 кастрычніка.

21 ліпеня 2016, Мінск
БЕЛТА