Як паведамляе Гомельскі гарвыканкам, мэта акцыі — папулярызацыя беларускай мовы. 21 лютага бібліятэкары горада будуць размаўляць з чытачамі і паміж сабой толькі на беларускай мове, правядуць невялікія апытанні і анкетаванні.

Падчас акцыі ў бібліятэках запланаваны шэраг мерапрыемстваў. Да прыкладу, у цэнтральнай гарадской бібліятэцы імя Герцэна адбудзецца сустрэча з супрацоўнікамі рэдакцыйна-выдавецкай установы "Літаратура і мастацтва". Госці мерапрыемства — галоўны рэдактар газеты "ЛіМ", пісьменнік Аляксандр Карлюкевіч, рэдактар аддзела публіцыстыкі "ЛіМ", журналіст Ірына Тулупава, галоўны рэдактар часопіса "Полымя", паэт Мікола Мятліцкі.

"Адбудзецца зацікаўленая размова супрацоўнікаў, вядомых і пачынаючых гомельскіх літаратараў, чытачоў бібліятэкі, выкладчыкаў і студэнтаў навучальных устаноў аб прыгажосці і непаўторнасці беларускай мовы, неабходнасці яе папулярызацыі", — гаворыцца ў прэс-рэлізе гарвыканкама.

Гомельскія паэты і празаікі сустрэнуцца 21 лютага з наведвальнікамі філіялаў гарадской бібліятэкі № 7 і № 14.

Бібліятэкары запрашаюць гамяльчан далучыцца да акцыі.

Алена Германовіч, БелаПАН
Гомель, 20 лютага 2011 

Ссылка на текущий документ: http://belarus.kz/aktueller/2-3/465/4582

Текущая дата: 23.12.2024