МУС пацвердзіў затрыманне начальніка ўпраўлення фармацэўтычнай інспекцыі і арганізацыі лекавага забеспячэння Міністэрства аховы здароўя Людмілы Равуцкай.

"Галоўнае ўпраўленне па барацьбе з арганізаванай злачыннасцю і карупцыяй (ГУБАЗіК) МУС Беларусі затрымала начальніка ўпраўлення фармацэўтычнай інспекцыі і арганізацыі лекавага забеспячэння Міністэрства аховы здароўя. Распачатая крымінальная справа па арт. 430 Крымінальнага кодэкса Беларусі (атрыманне хабару). Вядзецца следства", — паведаміла прэс-служба ведамства ў сацыяльнай сетцы "Фэйсбук".

29 жніўня Равуцкая выступіла на брыфінгу з нагоды ўвозу не зарэгістраванай у краіне вакцыны "Эўпента". Паводле яе слоў, Міністэрства аховы здароўя прыняло такое рашэнне для прадухілення зрыву календара імунапрафілактыкі і папярэджання надзвычайнай сітуацыі, а менавіта ўспышак інфекцыйных захворванняў, што пагражаюць жыццю.

13 жніўня ў Ганцавіцкім раёне Брэсцкай вобласці пасля прышчэпак памерла двухмесячнае дзіця. Раённы аддзел Следчага камітэта ініцыяваў праверку па факце смерці. Былі прызначаныя экспертныя даследаванні канфіскаваных медыцынскіх дакументаў і прэпаратаў, у прыватнасці дзвюх вакцын, якія ўвялі дзіцяці, — "Эўпента" (LG Chem, Паўднёвая Карэя) і "Імавакс Поліа" (Sanofi Pasteur, Францыя). Ужыванне дзвюх серый вакцын "Эўпента" і "Імавакс Поліа" прыпыненае да завяршэння расследавання.

На працягу мінулага лета прайшла хваля затрыманняў прадстаўнікоў сістэмы аховы здароўя.

25 чэрвеня старшыня КДБ Валерый Вакульчык паведаміў журналістам пра "выкрыццё маштабнай карупцыйнай схемы ў сферы аховы здароўя".

Затрымліваліся, у прыватнасці, дырэктар цэнтра экспертыз і выпрабаванняў у ахове здароўя Аляксандр Сталяроў, дырэктар "Белмедтэхнікі" Аляксандр Шарак, начальнік галоўнага ўпраўлення аховы здароўя Гродзенскага аблвыканкама Андрэй Стрыжак, начальнік ваенна-медыцынскага ўпраўлення Мінабароны Аляксей Яськоў, намеснік міністра аховы здароўя Ігар Ласіцкі, дырэктар РНПЦ траўматалогіі і артапедыі Аляксандр Бялецкі, гендырэктар "Белфармацыі" Вячаслаў Гніцій, дырэктар ААТ "Экзон" Валерый Васкевіч, галоўны ўрач 1-й гарадской клінічнай бальніцы Мінска Алег Фамін, галоўны ўрач Рэспубліканскага цэнтра медыцынскай рэабілітацыі і бальнеалячэння Сяргей Карыцька.

Паведамлялася таксама пра распачынанне крымінальных спраў у дачыненні да галоўных урачоў 9-й гарадской клінічнай бальніцы сталіцы Валерыя Кушнірэнкі, Мінскай абласной клінічнай бальніцы Андрэя Каралько і Віцебскай абласной клінічнай бальніцы Анатоля Аладзькі.

Пасля некаторым затрыманым мера стрымання была змененая.

БелаПАН
Мінск, 27 верасня 2018