Цягам месяца ў праваахоўныя органы неаднаразова паступалі заявы аб знікненні двухколавага транспарту. Пасля апытання пацярпелых і правядзенні шэрагу аператыўна-вышуковых мерапрыемстваў супрацоўнікі міліцыі высветлілі, што да крадзяжоў велатранспарту датычны адзін і той жа чалавек — непрацуючая 28-гадовая дзяўчына.

Паводле інфармацыі ГУУС Мінгарвыканкама, грамадзянка пранікала ў пад’езды жылых дамоў, дзе прыглядала пакінутыя без нагляду веласіпеды. Як правіла, мінчанка выкрадала толькі тыя з іх, на якіх не была ўстаноўлена замыкальная прылада. Пасля велатранспарт зладзюжка здавала ў ламбард.

Супрацоўнікі аддзела крымінальнага вышуку Маскоўскага РУУС г. Мінска затрымалі маладую асобу з доказамі злачынства ў момант здзяйснення чарговага крадзяжу. Са слоў падазраванай, такім чынам яна планавала падзарабіць на жыццё. Агульная сума шкоды ўстанаўліваецца.

Вядома, што ўсяго мінчанкай было выкрадзена восем веласіпедаў. Аднак у праваахоўнікаў ёсць падставы лiчыць, што затрыманая можа быць датычная і да іншых эпізодаў крадзяжу велатранспарту, здзейсненых на тэрыторыі сталіцы.

Сяргей Расолька
Звязда, 1 верасня 2020