У жылых дамах і інтэрнатах з колькасцю паверхаў два і больш будуць устанаўлівацца ліфты. Гэта прадугледжана змяненнем нумар 1 у Тэхнічны кодэкс устаноўленай практыкі ТКП 45-3.02-324-2018 "Жылыя будынкі. Будаўнічыя нормы праектавання"

Гэта змяненне не закране аднакватэрныя і блакаваныя жылыя дамы. Раней устаноўка ліфтаў прадугледжвалася ў жылых дамах і інтэрнатах пры вышыні будынка 14 м і больш. Прыкладна гэта вышыня пяціпавярховага дома, усё залежыць ад яго тыпавога праекта.

Ліфты, згодна з дакументам, павінны адпавядаць патрабаванням ТР МС 011/2011.

Вызначана і такое паняцце, як кватэра-студыя. Гэта кватэра агульнай плошчай не большай за 50 кв.м з туалетам, ваннай або сумешчаным санвузлом і без перагародкі паміж кухняй і жылым пакоем, але з функцыянальным раздзяленнем памяшкання на некалькі зон, адна з якіх - для прыёму і прыгатавання ежы.

Акрамя таго, цяпер у жылых дамах з халодным паддашкам або сумешчаным пакрыццём у кухнях, санітарных вузлах кватэр, размешчаных на верхнім паверсе, у вентыляцыйных каналах будуць устанаўлівацца бытавыя электравентылятары. А сістэмы ацяплення і вентыляцыі памяшканняў грамадскага прызначэння ў жылых будынках павінны быць асобнымі ад сістэм ацяплення і вентыляцыі саміх будынкаў. Гэта не датычыцца сістэм ацяплення жылых будынкаў з памяшканнямі, прызначанымі для размяшчэння на верхнім паверсе майстэрняў мастакоў, архітэктараў і да т.п. Прадугледжана ўстаноўка прыбораў уліку цеплавой энергіі з магчымасцю дыстанцыйнага счытвання паказанняў.

Новаўвядзенні ўступяць у сілу праз 10 дзён пасля афіцыйнага апублікавання дакумента.

На Нацыянальным прававым інтэрнэт-партале апублікавана яшчэ адно змяненне ў Тэхнічны кодэкс ўстаноўленай практыкі ТКП 45-3.02-324-2018 "Жылыя будынкі. Будаўнічыя нормы праектавання"  нумар 2, якое ўступае ў сілу адразу пасля яго апублікавання.

14 красавіка 2020, Мінск
БЕЛТА