Як паведамілі ў прэс-службе Федэрацыі прафсаюзаў Беларусі (ФПБ), матэрыяльная дапамога з прафсаюзнага бюджэту выдзялялася сем`ям, што выхоўваюць дзяцей школьнага ўзросту. Апрача таго, за сродкі гэтага бюджэту набываліся школьныя прылады, падручнікі, а таксама канцылярскія тавары, адзенне і абутак.

Сума матэрыяльнай дапамогі, выдзеленая прафсаюзамі на падрыхтоўку дзяцей да школы сёлета, больш чым у 10  разоў вышэйшая за аналагічную фінансавую падтрымку, аказаную ў 2010 годзе, зазначаецца ў паведамленні прэс-службы.

"Прафсаюзы не пакінулі бацькоў сам-насам з цяжкасцямі пры падрыхтоўцы дзяцей да школы, а аказалі рэальную, адчувальную, а для многіх і адзіную ў гэты перыяд матэрыяльную падтрымку, — цытуе прэс-служба старшыню ФПБ Леаніда Козіка. — У нас ёсць прыклады, і іх нямала, калі прафсаюзныя камітэты закуплялі па паўтысячы ранцаў для дзяцей-школьнікаў усіх работнікаў, выдзялялі грошы на куплю школьнага адзення і абутку".

Асаблівую ўвагу прафсаюзныя арганізацыі надавалі "шматдзетным і малазабяспечаным сем`ям", апрача таго "падшэфныя дзіцячыя сацыяльныя прытулкі і школы-інтэрнаты" таксама атрымалі матэрыяльную падтрымку.

Прэс-служба ФПБ нагадала, што дабрачынная акцыя "Прафсаюзы — дзецям" праводзіцца з лістапада 2002 года. У межах гэтага праекта "пасільная матэрыяльная дапамога" аказваецца пры "падрыхтоўцы да школы, да Дня абароны дзяцей, для правядзення навагодніх і калядных мерапрыемстваў".

Захар Шчарбакоў, БелаПАН
Мінск, 14 верасня 2011

Ссылка на текущий документ: http://belarus.kz/aktueller/2-410/16/9221

Текущая дата: 23.11.2024