Аляксандр Лукашэнка адзначыў, што спыніўся на кандыдатуры Ігара Карпенкі, выбіраючы сярод многіх прапанаваных.

"Вас не трэба пераконваць у ідэйнай накіраванасці нашай дзяржавы. І вас не трэба пераконваць у тым, якая наогул у нас павінна быць адукацыя", - сказаў Прэзідэнт.

"Вы - чалавек прагрэсіўны. І вы цудоўна ведаеце хібы нашай савецкай адукацыі, непасрэдна ведаеце лепшыя школы краіны і іх недахопы. У вас вялікі вопыт работы ў сацыяльнай сферы, перш за ўсё ў адукацыі. Гэта галоўныя фактары, якія схілілі мяне да таго, што менавіта Карпенка павінен сёння ўзначаліць гэты напрамак", - растлумачыў сваё кадравае рашэнне кіраўнік дзяржавы.

Аляксандр Лукашэнка падкрэсліў, што перад Ігарам Карпенкам стаіць шмат задач па развіцці і вырашэнні розных праблемных пытанняў у адукацыі. У тым ліку размова ідзе аб далейшай рэалізацыі вызначанай для гэтай сферы канцэпцыі, удасканаленні вучэбных праграм.

"На жаль, мае ўстаноўкі не ў поўным аб`ёме рэалізаваны ў адукацыі. І вам гэта трэба будзе ўсё рэалізаваць", - адзначыў Прэзідэнт.

Да гэтага часу Ігар Карпенка займаў пасаду намесніка старшыні Мінскага гарадскога выканаўчага камітэта.

Біяграфія

Карпенка Ігар Васільевіч нарадзіўся ў 1964 годзе ў Новакузнецку Кемераўскай вобласці Расійскай Федэрацыі.

У 1989 годзе скончыў Мінскі дзяржаўны педагагічны інстытут імя А.М. Горкага, у 2008 годзе - Акадэмію кіравання пры Прэзідэнце Рэспублікі Беларусь.

У 1982-1984 гадах служыў у радах Савецкай Арміі на тэрыторыі Чэхаўскага раёна Маскоўскай вобласці.

З 1989 па 1993 год быў сакратаром камітэта камсамола, начальнікам аддзела выхаваўчай работы Мінскага дзяржаўнага педагагічнага інстытута імя А.М. Горкага.

У 1993-1995 гадах - начальнік аддзела выхаваўчай работы Беларускага дзяржаўнага педагагічнага ўніверсітэта.

З 1995 па 2001 год займаў пасаду начальніка аддзела выхаваўчай работы, начальніка ўпраўлення выхаваўчай работы Беларускага дзяржаўнага педагагічнага ўніверсітэта імя М. Танка.

У перыяд 2001-2003 гадоў быў начальнікам упраўлення выхаваўчай работы БДПУ, у 2003-2004 гадах - прарэктар па выхаваўчай і сацыяльнай рабоце.

З 2004 па 2008 год з`яўляўся членам Пастаяннай камісіі Палаты прадстаўнікоў Нацыянальнага сходу Рэспублікі Беларусь па ахове здароўя, фізічнай культуры, справах сям`і і моладзі.

У 2008-2011 гадах - намеснік старшыні Пастаяннай камісіі па міжнародных справах і сувязях з СНД Палаты прадстаўнікоў Нацыянальнага сходу Рэспублікі Беларусь.

З 2011 года да гэтага часу займаў пасаду намесніка старшыні Мінскага гарадскога выканаўчага камітэта.

15 снежня 2016, Мінск
БЕЛТА