"Акцыя "Нашы дзеці" ўрачыста стартавала ў Беларусі 15 снежня і прадоўжыцца да 15 студзеня. Перад зімовымі святамі асабліва важна звярнуць увагу на тых дзяцей, каму цяпер няпроста, падтрымаць іх і дапамагчы ім. Гэта важна рабіць для таго, каб у нас фарміравалася дастойнае грамадства. Мы нездарма выбралі для наведвання Мінскае гарадское кадэцкае вучылішча. Тут з 179 навучэнцаў амаль 100 - дзеці, якія выхоўваюцца ў замяшчаючых сем`ях, дзеці са шматдзетных сем`яў і дзеці, якія страцілі бацькоў. Дзяржава стварае гэтым дзецям умовы для рэалізацыі і вызначэння свайго жыццёвага шляху. Прыемна ўсведамляць, што хлопцы з кадэцкага вучылішча сканцэнтраваліся на абароне і службе сваёй Радзіме. Такія матывацыйныя ўмовы садзейнічаюць фарміраванню сапраўдных патрыётаў сваёй краіны", - сказаў Ігар Петрышэнка.

У Беларусі 8 кадэцкіх вучылішчаў, у якіх навучаюцца каля 1,6 тыс. дзяцей. Больш за 70 працэнтаў з іх паступаюць на ваенныя факультэты ВНУ краіны, у Ваенную акадэмію і Акадэмію МУС. Акрамя таго, кадэцкія вучылішчы аснашчаны добрай матэрыяльнай базай, а праграмы навучання, паводле слоў намесніка прэм`ер-міністра, будуць удасканальвацца.

"У кадэцкім вучылішчы ў юнакоў ёсць магчымасць жыць у калектыве, асвойваць вучэбную праграму павышанага ўзроўню складанасці, наведваць факультатыўныя заняткі, спасцігаць ваенную падрыхтоўку. Тут фарміруюцца сапраўдныя мужчыны і будучыя абаронцы краіны. Пры гэтым усе дзеці напярэдадні свят заўсёды чакаюць цудаў, выканаць якія пад сілу толькі дарослым. Таму мы павінны ствараць для дзяцей гэтыя цуды не толькі перад новым годам, а на пастаяннай аснове", - рэзюмаваў Ігар Петрышэнка.

Традыцыйна ўдзельнікамі навагодняй дабрачыннай акцыі "Нашы дзеці" становяцца дзеці, якія засталіся без апекі бацькоў, дзеці-інваліды, пераможцы рэспубліканскіх, абласных конкурсаў, спартакіяд, розных мерапрыемстваў. Таксама задзейнічаны студэнты і навучэнцы, якія дасягнулі пэўных поспехаў у вучобе, грамадскай рабоце. Чакаецца, што толькі на рэспубліканскім узроўні ў акцыі паўдзельнічаюць больш за 20 тыс. дзяцей. Мноства мерапрыемстваў па ўсёй краіне пройдзе і на абласным узроўні. Мэта акцыі ў тым, каб падтрымаць дзяцей, якія асабліва маюць патрэбу ў дапамозе і падтрымцы.

20 снежня 2022, Мінск
БЕЛТА