У міліцыю 14 ліпеня звярнулася прадавец аднаго з магазінаў райцэнтра Глыбокае (Віцебская вобласць) і паведаміла, што невядомы мужчына разлічыўся за прадукты грашовай купюрай наміналам 20 рублёў (узору 2009 года), якая выклікала ў яе сумненне ў сапраўднасці.

Падчас аператыўна-вышуковых мерапрыемстваў супрацоўнікі УБЭЗ КМ УУС Віцебскага аблвыканкама сумесна з групай БЭЗ Глыбоцкага РАУС па гарачых слядах устанавілі, што купюрай разлічыўся 48-гадовы мясцовы жыхар. Пры правядзенні разбору высветлілася, што фальшыўку збытчыку перадаў знаёмы, 46-гадовы мясцовы жыхар, непрацоўны і неаднаразова судзімы. Ён таксама ведаў, што грашовая купюра падробленая.

"Роўна суткі абодва сябры ўсяляк спрабавалі ўтаіць абставіны паступлення да іх падробкі і звесткі пра яе вытворца, але дзякуючы разумным дзеянням аператыўных супрацоўнікаў ён быў усталяваны. Як аказалася, мясцовы 31-гадовы бізнесмен, што займаецца вырабам рэкламнай прадукцыі, на працоўным месцы адсканаваў 20 сапраўдных беларускіх рублёў, надрукаваў атрыманую карцінку на звычайным прынтары і перадаў яе вышэйназванаму знаёмаму, пры гэтым ён папярэдзіў яго, што купюра не сапраўдная", — паведамілі ў ГУБЭЗ.

Згодна з заключэннем, перададзены на экспертызу грашовы білет НБ РБ вартасцю 20 рублёў выраблены не на прадпрыемстве, якое ажыццяўляе вытворчасць грашовых знакаў, і ўсе выявы на ім выкананыя спосабам каляровага капельна-струменнага друку на прынтары.

У дачыненні да збытчыкаў фальшыўкі распачатая справа на падставе ч. 1 арт. 221 КК (выраб і збыт падробленых грошай), падазроны затрыманы, праводзіцца расследаванне.

Паводле звестак упраўлення, за першае паўгоддзе 2016 года выяўлена 432 злачынствы згодна з арт. 221 КК (выраб, захоўванне або збыт падробленых грошай і каштоўных папер). У асноўным яны звязаныя з выкарыстаннем і вырабам падробленай замежнай валюты.

Аляксей Аляксандраў, БелаПАН
Мінск, 15 ліпеня 2016