У Беларусі расце колькасць фізічных асоб, якія зарэгістраваліся як рамеснікі. 

Як падкрэсліваюць у прэс-службе, у Беларусі створаны спрыяльныя ўмовы для ажыццяўлення рамеснай дзейнасці, дзякуючы чаму колькасць фізічных асоб, якія выказваюць жаданне займацца самастойнай дзейнасцю па вытворчасці вырабаў рамеснай творчасці, пастаянна павялічваецца.

У 2013 годзе збор за ажыццяўленне рамеснай дзейнасці выплацілі 8083 чалавекі, а ў 2014 годзе - на 8,6 працэнта больш (8776). За першае паўгоддзе 2015 года ў цэлым па рэспубліцы ўжо зарэгістраваліся больш як 7 тыс. новых рамеснікаў, з якіх 2940 чалавек - за другі квартал бягучага года.

Паводле даных Мінэканомікі, за першае паўгоддзе 2015 года больш за ўсё тых, хто выплаціў збор за ажыццяўленне рамеснай дзейнасці, зафіксавана ў Мінску (1643 чалавекі) і Віцебскай вобласці (1042 чалавекі). Менш за ўсё рамеснікаў зарэгістравалася ў Магілёўскай вобласці (752 чалавекі).

27 ліпеня 2015, Мінск
БЕЛТА