"Давайце дамовімся так: будзем мы працаваць ці не будзем, але за будучую пяцігодку пытанне па цяпліцах трэба зняць! Трэба пабудаваць іх столькі і паводле самых сучасных тэхналогій, колькі нам трэба. За пяцігодку гэтае пытанне вырашым", — цытуе прэзідэнта яго прэс-служба. 

"А канкурэнцыя... Калі іспанцы жадаюць у нас прадаць свой тавар, хай канкуруюць і прадаюць", — сказаў кіраўнік дзяржавы. 

Лукашэнка лічыць, што неабходна ўкладваць сродкі, наколькі гэта магчыма, і ствараць цяпліцы непадалёк ад Мінска. Вырашчаная ў межах Мінскай кальцавой дарогі ў цяпліцах прадукцыя зможа паступаць у гандлёвыя сеткі сталіцы з найменшымі затратамі на дастаўку. 

Ён таксама заявіў, што лічыць правільным прынятае ў свой час рашэнне аб захаванні цяплічнай гаспадаркі ў краіне: "Былі ў нас дзеячы, яны цяпер у апазіцыі, а некаторыя збеглі з краіны, яны мяне пераконвалі: камбайны не трэба — купім у немцаў, плугі — таксама купім, трактароў "МТЗ-80", "МТЗ-82" — хопіць, замест цукровых буракоў трыснёг купім, завязем, не трэба нам буракі. Гэтак жа прапаноўвалі, што і цяпліцы не трэба, мы не здолеем канкураваць". 

"У тыя часы мяне пераконвалі, што мы не здолеем канкураваць на рынку ні ўнутры, ні ў Расіі ў сувязі з тым, што розніца ў цэнах на газ. Маўляў, трэба цяпліцы ўсе прыбраць, зямлю зраўнаваць і купляць агароднінную прадукцыю за межамі. Тады я сказаў: не, вы адновіце ўсе цяпліцы", — сказаў Лукашэнка. 

Паводле вынікаў наведвання агародніннай фабрыкі кіраўнік дзяржавы запатрабаваў разабрацца з фарміраваннем рознічных цэн на плодаагароднінную прадукцыю, якая, трапляючы на паліцы гандлёвых сетак, паводле яго слоў, становіцца ў два разы даражэйшай. "На гэтым ніхто не павінен нажывацца! А то прыгожа: памідоры, агуркі і іншае. А цана? Хто ў кішэню кладзе грошы за гэтую прыгажосць?" — спытаў кіраўнік дзяржавы. 

Лукашэнка папярэдзіў урад аб безумоўным выкананні яго даручэння па ахове ўнутранага рынку. "Мы аддалі свае рынкі іспанцам, галандцам, якія нас "квасяць" што ні крок, а самі прабіваемся ў Афрыку і Кітай. Гэта нармальна? Не. Вырашайце!" — перадае яго словы прэс-служба.

Аляксей Аляксандраў, БелаПАН
Мінск, 31 ліпеня 2015