Магазін "Чароўны астравок" адкрые група кампаній Dream Makers, якая выпускае цацкі ў тым ліку пад брэндам Fancy.

Як зазначыў Вялікі, плошча магазіна складзе 800 квадратных метраў. Апрача цацак у ім будуць прапанаваныя іншыя тавары для дзяцей: біжутэрыя, спартыўны інвентар, канцылярскія прылады.

"Выбар месца не выпадковы: фармат "Чароўнага астраўка" спалучаецца з канцэпцыяй гандлёвага цэнтра Leto — продаж тавараў па зніжаных цэнах і правядзенне круглагадовага распродажу. Усе цацкі будуць або зробленыя ў Беларусі, або закупленыя наўпрост у замежных вытворцаў. Кожны пяты тавар будзе прадавацца з дадатковай скідкай да 30%", — паведаміў спецыяліст.

Аператар ужо падпісаў дагавор з забудоўшчыкам і плануе адкрыць магазін у дзень пачатку працы гандлёвага цэнтра, адкрыццё якога запланаванае на верасень. "Месца шукалі доўга: разглядалі магчымасці арэнды памяшканняў у іншых гандлёвых цэнтрах і адкрыцця магазіна, які стаіць асобна. Але ў выніку ўсё ж выбралі цэнтр распродажу Leto. У першую чаргу з-за новага для краіны фармату, які падыходзіць нам канцэптуальна і павінен забяспечыць магутны паток пакупнікоў", — растлумачыў маркетолаг групы кампаній Dream Makers Ганна Яльцова.

Цэнтр пастаяннага распродажу Leto пабудаваны ў Мінску на праспекце Жукава. У ім размесцяцца прыблізна 70 магазінаў больш як 40 брэндавых сетак, усе яны будуць прадаваць тавары па зніжаных цэнах і праводзіць распродаж. Паводле ацэнак кампаніі "Твая сталіца. Кіраўніцтва праектамі", штодзённа гандлёвы цэнтр змогуць наведваць да 20 тыс. чалавек. Забудоўшчыкам выступае ААТ "Кіраўніцкая кампанія холдынга "БелГАЗаўтасэрвіс", якая ўжо ўклала ў будаўніцтва аб`екта прыблізна 40 млн. долараў.

Аляксей Аляксандраў, БелаПАН
Мінск, 17 чэрвеня 2015