Галоўным следчым упраўленнем Следчага камітэта Беларусі завершана следства па крымінальнай справе ў дачыненні да 28-гадовага выхадца Брэсцкай вобласці, які забіў трох жанчын з-за 40 мільёнаў рублёў. 

Першымі ахвярамі абвінавачванага сталі два прадаўцы аднаго з харчовых магазінаў у Лідзе. Іх целы са шматлікімі цялеснымі пашкоджаннямі былі знойдзеныя на працоўным месцы 15 верасня 2013 года. Праз год аналагічнае злачынства з падобнымі прыкметамі было ўчынена ў вёсцы Сялец Лідскага раёна. Тады цела жанчыны было знойдзена ў лесапаласе недалёка ад магазіна, у якім яна працавала. 

Як адзначаюць у СК, доўгі час злачынца заставаўся на волі, бо старанна рыхтаваўся да кожнага злачынства, плануючы не толькі спосаб і выбіраючы месца ўчынення злачынства, але таксама і шляхі магчымага адыходу. 

Раскрыць забойствы, учыненыя з асаблівай жорсткасцю і цынізмам, і затрымаць асобу, якая іх учыніла, удалося дзякуючы працы следчых, аператыўных супрацоўнікаў МУС і спецыялістаў Дзяржаўнага камітэта судовых экспертыз, якія ўзнавілі да найдрабнейшых падрабязнасцяў кожную дэталь учыненых злачынстваў, сказала прадстаўнік СК. 

Па крымінальнай справе следчымі былі дапытаныя сотні сведак, праведзена некалькі дзясяткаў складаных экспертыз. 

З удзелам абвінавачванага на месцы былі ўстаноўленыя акалічнасці забойстваў. У кожным выпадку мужчына меў намер завалодаць маёмасцю як пацярпелых, так і магазінаў, у якіх яны працавалі прадаўцамі.

Мужчыну прад`яўлена абвінавачанне па шэрагу артыкулаў КК, у тым ліку ў забойстве трох асоб, учыненым з асаблівай жорсткасцю з карыслівых меркаванняў. 

Крымінальная справа перададзеная пракурору для накіравання ў суд. 

Варта адзначыць, што па гэтых складах злачынстваў абвінавачванаму можа пагражаць вышэйшая мера пакарання.

Вячаслаў Будкевіч, БелаПАН
Мінск, 17 чэрвеня 2015