"Беларускія вучоныя прымуць удзел ва ўдасканаленні паскаральніка элементарных часціц, а таксама ў распрацоўцы новых тэарэтычных падыходаў да апісання фізічных працэсаў і іх прагназавання", - сказаў ён.
Цяпер паскаральнік заражаных часціц спынены з мэтай правядзення яго мадэрнізацыі. Яна зойме каля двух гадоў. Пасля ўдасканалення Вялікі адронны калайдар павінен пачаць працаваць на поўную моц.
За апошнія гады беларускай навукай атрыманы сур`ёзныя вынікі. Айчынныя вучоныя ўнеслі ўклад у адкрыццё базона Хігса. Сярод 19 беларускіх суаўтараў адкрыцця 11 - грантатрымальнікі БРФФД.
Даследчыкі краіны таксама ўдастоіліся сусветнага прызнання за развіццё такога навуковага напрамку, як нанаэлектрамагнетызм. Гэты навуковы тэрмін уведзены ў абарот беларускімі вучонымі. У рамках гэтага напрамку вырашаюцца як фундаментальныя, так і прыкладныя задачы, у тым ліку стварэнне новых функцыянальных матэрыялаў для радыёэлектронікі, оптаэлектронікі і фатонікі.
У 2012 годзе Беларускі рэспубліканскі фонд фундаментальных даследаванняў падтрымаў 1250 праектаў. Такая ж колькасць праектаў атрымае фінансавую дапамогу ў бягучым годзе. Аб`ёмы фінансавання БРФФД у 2013 годзе павялічаны ў 1,6 раза. "Работы вядуцца па ўсіх перспектыўных напрамках: ад фізікі да гуманітарных навук", - адзначыў старшыня навуковага савета.
Сярод перспектыўных - праекты ў галіне оптыкі, стварэння новых тыпаў лазераў, біялогіі, сельскай гаспадаркі і біятэхналогій. Буйны цыкл работ звязаны з развіццём у Беларусі нанатэхналогій.
У апошнія гады БРФФД была падтрымана серыя тэарэтычных і эксперыментальных праектаў беларускіх вучоных, накіраваных на стварэнне ў складзе Вялікага адроннага калайдара мегаўстановак ATLAS і CMS, фарміраванне, абгрунтаванне і развіццё фізічнай праграмы эксперыментаў, якія прывялі да адкрыцця базона Хігса. У гэтых праектах удзельнічалі вучоныя з Інстытута фізікі НАН Беларусі, Нацыянальнага цэнтра фізікі часціц высокіх энергій БДУ, НДІ ядзерных праблем БДУ.
У 2012 годзе тры беларуска-расійскія калектывы атрымалі прэміі Расійскай акадэміі навук і Нацыянальнай акадэміі навук Беларусі. У прыватнасці, вучоныя ўдастоіліся гэтай узнагароды за даследаванні ў галіне нанаструктураваных парашковых канструкцыйных матэрыялаў і пакрыццяў.
Аб`яднаны інстытут праблем інфарматыкі НАН Беларусі і БДУ разам з удзелам украінскіх вучоных стварылі навуковыя асновы спадарожнікавага маніторынгу расліннага покрыва Беларусі, уключаючы метады высокадакладнай каліброўкі касмічнай апаратуры і прасторава-часавую візуалізацыю інфармацыі аб стане сельгасугоддзяў, аб развіцці і наступствах экстрэмальных сітуацый (засухі, пажары, паводкі і да т.п.). Такая інфармацыя важна для Мінсельгасхарча, Міністэрства па надзвычайных сітуацыях, страхавых і іншых арганізацый.
16 красавіка 2013, Мінск
Андрэй Асфура - БЕЛТА