Самыя багатыя — праграмісты, самая нізкая зарплата — у сацыяльных работнікаў
Намінальная налічаная сярэднямесячная заработная плата беларусаў у студзені—лістападзе 2012 года склала 3 млн 649,7 тыс. рублёў, у тым ліку ў лістападзе — 4 млн 244,3 тыс. рублёў.
Самая высокая сярэдняя заработная плата ў лістападзе гэтага года была ў работнікаў ІT‑індустрыі — 10 млн 392,5 тыс. рублёў.
Таксама высокая сярэдняя зарплата ў лістападзе была зафіксавана ў работнікаў паветранага транспарту (9 млн 72,3 тыс. рублёў) і на вытворчасці коксу, нафтапрадуктаў і ядзерных матэрыялаў (8 млн 450,4 тыс. рублёў).
Самую нізкую зарплату ў лістападзе атрымалі сацыяльныя работнікі (2 млн 580,5 тыс. рублёў) і работнікі адукацыі (2 млн 968,9 тыс. рублёў).
У прамысловасці сярэдняя заработная плата ў лістападзе склала 4 млн 825,7 тыс. рублёў, на транспарце і ў сувязі — 4 млн 727,6 тыс., у будаўніцтве — 5 млн 373,6 тыс., у сельскай гаспадарцы, паляванні і лясной гаспадарцы — 3 млн 231,4 тыс. рублёў, у галіне аховы здароўя — 3 млн 253,7 тыс. рублёў. Пры гэтым сярэдняя заработная плата ўрачоў была роўная 5 млн 329,7 тыс. рублёў, сярэдняга медыцынскага персаналу — 3 млн 170,9 тыс.
Максімальны тэмп росту рэальнай заработнай платы ў студзені—лістападзе 2012 года да ўзроўню студзеня—лістапада 2011-га назіраўся ў сферы рамонту бытавых вырабаў і прадметаў асабістага карыстання (145,5%), на сухапутным транспарце (130,4%). Мінімальны — у сферы архітэктуры, інжынерных паслуг (98,2%), у галіне радыёвяшчання і тэлебачання (101,8%), на водным транспарце (106,6%).
Самыя багатыя і самыя бедныя рэгіёны
Традыцыйна лідзіруе па ўзроўні сярэдняй заработнай платы ў Беларусі Мінск (5 млн 448,5 тыс. рублёў). Мінімальны сярэдні заробак адзначаецца ў Брэсцкай вобласці (3 млн 770,4 тыс. рублёў).
У Мінскай вобласці гэты паказчык склаў 4 млн 195,6 тыс. рублёў, у Віцебскай — 3 млн 765,2 тыс. рублёў, Гомельскай — 4 млн 062,1 тыс. рублёў, Гродзенскай — 3 млн 836, 1 тыс. рублёў, Магілёўскай — 3 млн 916,8 тыс. рублёў.
Лідарамі сярод рэгіёнаў краіны па росце рэальнай заработнай платы з`яўляюцца Гомельская і Мінская вобласці.
Яшчэ раз пра "мінімалку" і тарыфную стаўку першага разраду
З 1 студзеня гэтага года месячная мінімальная заработная плата (МЗП) была ўстаноўлена на ўзроўні 1 млн рублёў, гадзінная мінімальная заработная плата — 5 тыс. рублёў. З улікам індэксацыі МЗП за лістапад гэтага года склала 1 млн 109 тыс. 120 рублёў, гадзінная мінімальная заработная плата — 6 тыс. 580 рублёў.
З 1 студзеня 2013 года мінімальная зарплата ў Беларусі будзе раўняцца 1 млн 395 тыс. рублёў. Памер гадзіннай мінімальнай заработнай платы з 1 студзеня 2013 года — 8 тыс. 340 рублёў.
Тарыфная стаўка першага разраду ў 2012 годзе пераглядалася тройчы. У апошні раз гэта адбылося 1 верасня, калі яна была павышана з 210 тыс. рублёў да 225 тыс.
На пасяджэнні Нацыянальнага савета па працоўных і сацыяльных пытаннях, якое адбылося 21 снежня, міністр працы і сацыяльнай абароны Марыяна Шчоткіна заявіла, што зноў разглядаецца пытанне павелічэння тарыфнай стаўкі першага разраду. Але канкрэтныя тэрміны яе павышэння яшчэ не вызначаны.
Святлана Бусько
Звязда, 29 снежня 2012