Калі ў Беларусі з’явіцца ядзерная зброя, то Кіеў паўстане перад пытаннем адкрыцця другога фронту, такое меркаванне выказаў украінскі дэпутат Давід Арахамія.

"Калі яны (у Расіі) сапраўды сур’ёзна падыдуць да гэтага, я думаю, мы сутыкнёмся з сапраўдным выклікам адкрыцця другога фронту. Гэта прыкладна, я думаю, больш за тысячу кіламетраў… патэнцыяльнага фронту з Беларуссю", - сказаў член камітэта па пытаннях нацыянальнай бяспекі, абароны і разведкі Вярхоўнай рады ў эфіры тэлеканала Sky News.

Ён дадаў, што ў гэтым выпадку мабілізацыя ва Украіне ўзмоцніцца, і ў армію будзе прызвана яшчэ больш грамадзян, паколькі ўкраінскім войскам спатрэбіцца "па меншай меры яшчэ восем брыгад, каб кантраляваць гэтую лінію фронту".

Паводле яго слоў, цяпер у Кіеве расцэньваюць заяву Расіі наконт размяшчэння на беларускай тэрыторыі ядзернай зброі "больш як пагрозу" і не лічаць, што гэта сапраўды адбудзецца.

Аднак Арахамія адзначыў, што "ўвесь свет павінен быць гатоў".

Нагадаем, што ў мінулую суботу расійскі прэзідэнт Уладзімір Пуцін заявіў, што да 1 ліпеня 2023 года плануецца скончыць будаўніцтва сховішча для тактычнай ядзернай зброі на беларускай тэрыторыі.

Паводле яго слоў, кіраўнік дзяржавы Аляксандр Лукашэнка ўжо даўно ставіць пытанне аб тым, каб у Беларусі была размешчана расійская ядзерная зброя.

Расійскі лідар падкрэсліў, што ў гэтым выпадку ўсе дзеянні робяцца па аналогіі з палітыкай ЗША, якія размясцілі сховішчы для ядзернай зброі на тэрыторыі шасці дзяржаў.

У Крамлі ў сваю чаргу падкрэслілі, што рэакцыя Захаду ніяк не паўплывае на планы Расіі размясціць тактычную ядзерную зброю ў Беларусі.

Мінск, 27 сакавіка 2023
Sputnik