У конкурсе апроч беларускіх аўтараў прымалі ўдзел прадстаўнікі Расіі, Ірана, Узбекістана, Казахстана, Сербіі, Малдовы, Індыі і Луганскай Народнай Рэспублікі. На фестывалі было прадстаўлена больш за 170 работ.

У фінальную частку ўвайшоў відэаролік аб будаўніцтве штучнай загароды ў Белавежскай пушчы тэлерадыёкампаніі «Брэст». Ён уздымае сур’ёзную экалагічную праблему: пасля ўзвядзення Польшчай на польска-беларускай мяжы высокага плота з калючым дротам, які падзяляе запаведнік, у Белавежскай пушчы будзе парушаная экасістэма, пацерпяць папуляцыі дзікіх жывёл, у тым ліку зубра. «Вышыня сцяны — пяць з паловай метраў, меркаваная працягласць — 186 кіламетраў, — гаворыцца ў тэлевыпуску. — Белавежская пушча можа страціць сваю цэласнасць як унікальная трансгранічная прыродная тэрыторыя. Дзве краіны — адна пушча. Жывёлы без межаў!» Праца атрымала спецыяльны прыз конкурсу.

Дыпломамі адзначаны і іншыя беларускія працы-фіналісты. Сярод іх — цыкл праграм «Зялёны свет» вытворчасці радыё «Мір» (прадстаўніцтва МТРК «Мір» у Беларусі), сюжэт тэлеканала АНТ «Лекі для пчол» аб адным з праектаў ініцыятывы «100 ідэй для Беларусі». Спецыяльнага Падзячнага ліста ўдастоена Мінская гімназія № 19 за сістэмны падыход да экалагічнай адукацыі і выхавання дзяцей і падлеткаў.

Дырэкцыя фестывалю таксама падзякавала за ўдзел у фестывалі і наватарства ў экалагічнай асвеце мінскага эколага і педагога Руслана Шайкіна, калектыў і вучняў сярэдняй школы № 12 г. Гродна, рэдакцыю «Радыё-Мінск», Міністэрства прыродных рэсурсаў і аховы навакольнага асяроддзя Рэспублікі Беларусь.

Звязда, 21 верасня 2022