Дзеючы прэзідэнт Літвы Гітанас Науседа перамог у другім туры прэзідэнцкіх выбараў краіны, набраўшы 74,43% галасоў, паведаміла Галоўная выбарчая камісія (ДВК) краіны пасля апрацоўкі звестак з усіх 1 895 выбарчых участкаў.

Саперніцай Науседы ў другім туры выбараў была прэм’ер-міністр Літвы Інгрыда Шыманітэ, вылучаная кіруючай партыяй "Саюз Айчыны – Хрысціянскія дэмакраты Літвы". Яна набрала 24,06%.

Яшчэ да заканчэння падліку галасоў Шыманітэ павіншавала Науседу, а ён падзякаваў ёй за "карэктную барацьбу". Яна таксама паведаміла, што вернецца да працы ў якасці прэм’ер-міністра ў панядзелак.

Гэтыя ж два кандыдаты прэтэндавалі на першую пасаду ў краіне і на папярэдніх выбарах, у 2019 годзе. Тады Шыманітэ выйграла першы тур, але прайграла Науседу ў другім.

Па даных ДВК, яўка выбаршчыкаў у другім туры склала 49,61% (у першым туры была 59,95%). Непасрэдна ў нядзелю – у асноўны дзень галасавання – прагаласавалі 38,58%, загадзя сваю волю выказалі 11,03%. Усяго права голасу маюць 2,4 млн літоўскіх грамадзян.

Дзеючы кіраўнік дзяржавы лідзіраваў і ў першым туры, які прайшоў 13 мая, аднак пераканаўчай перамогі атрымаць не змог. У ходзе галасавання ён набраў 44,19% галасоў.

Тады ў выбарах удзельнічалі восем кандыдатаў, сярод якіх, акрамя Науседы і Шыманітэ, падтрымку выбаршчыкаў атрымалі адвакат Ігнас Веляге (12,35%), экс-дэпутат Рэмігіюс Жамайтайціс (9,21%) і ўрач Эдуардас Вайткус (7,31%). Іх палітыка была апазіцыйнай у адносінах да дзеючай улады.

Прэзідэнт у Літве выбіраецца тэрмінам на пяць гадоў, і, паводле канстытуцыі, не больш як на два тэрміны. Першы раз Науседа ўзначаліў краіну ў 2019 годзе пасля Далі Грыбайскайтэ, якая выбіралася двойчы.

Науседа ўжо паабяцаў прадоўжыць цяперашні знешнепалітычны курс Літвы.

Мінск, 27 траўня 2024
Sputnik