Па словах кіраўніка міліцыі Данецкай вобласьці Вячаслава Аброськіна, стралялі сэпаратысты з гэтак званай «Данецкай народнай рэспублікі». Іх мэтай быў блокпост украінскіх праваахоўных органаў.

Раней у аўторак стала вядома, што сэпаратысты з танкаў і сыстэм залпавага агню «Град» абстралялі украінскіх вайскоўцаў, якія базуюцца ў аэрапорце Данецку. Пры абстрэле разбурана дыспэтчарская вежа на тэрыторыі аэрапорта, інфармацыі пра страты бакоў канфлікту няма. У прэсавым цэнтры ўкраінскай Анты-тэрарыстычнай апэрацыі (АТА) паведамляюць, што цяпер сытуацыя ў раёне Данецкага аэрапорта стабілізаваная. Усяго за апошнія суткі сэпаратысты больш за 80 разоў абстралялі пазыцыі ўкраінскіх вайскоўцаў у Данбасе.

Прадстаўнікі «Данецкай народнай рэспублікі», у сваю чаргу, заявілі пра больш як 60 парушэньняў рэжыму спыненьня агню з боку ўрадавых войскаў.

У штабе АТА паведамляюць пра павелічэньне колькасьці і інтэнсіўнасьці абстрэлаў пазыцый украінскіх вайскоўцаў у Данбасе. Пра гэта таксама заяўляюць назіральнікі Арганізацыі бясьпекі і супрацоўніцтва ў Эўропе.

Паводле зьвестак ААН, з красавіка 2014 году ў выніку баявых дзеяньняў на ўсходзе Украіны загінулі больш за 4700 чалавек, яшчэ больш за 10 000 чалавек атрымалі раненьні.

Радыё Свабода
13 студзеня 2015, Менск