«Мы чакаем пацьверджаньня ад прадстаўнікоў „ДНР-ЛНР“ аб іх гатоўнасьці ўзяць удзел у пасяджэньні», — сказаў Перабійніс на брыфінгу ў сераду.

Пры гэтым ён не назваў дату сустрэчы, сказаўшы толькі, што ўкраінскі бок спадзяецца на тое, што гэта адбудзецца як мага хутчэй — «да канца гэтага тыдня». Што тычыцца месца сустрэчы, то, па словах прэсавага сакратара МЗС Украіны, разглядаецца «традыцыйна Менск», а таксама рэжым відэаканфэрэнцыі.

Паводле сталага прадстаўніка так званай Данецкай Народнай Рэспублікі на перамовах Дзяніса Пушыліна, сустрэча можа адбыцца 16 студзеня. «Мы атрымалі ліст ад АБСЭ з адпаведнай прапановай» — заявіў ён Данецкаму агенцтву навінаў, якое цытуе ТАСС. Па словах Пушыліна, «ДНР» гатовая прыняць удзел у сустрэчы.

Сустрэчы трохбаковай кантактнай групы па ўрэгуляваньні сытуацыі ва Ўкраіне праходзяць у фармаце «Расея-Ўкраіна-АБСЭ». Менскі фармат перамоваў прадугледжвае ўдзел ня толькі пасла РФ ва Ўкраіне Міхаіла Зурабава, экс-прэзыдэнта Ўкраіны Леаніда Кучмы і спэцпасланьніка АБСЭ Хайдзі Тальявіні, але таксама прадстаўнікоў самаабвешчаных Данецкай і Луганскай рэспублік.

Апошняя сустрэча ў Менску ў гэтым фармаце адбылася 24 сьнежня. Паведамлялася, што была дасягнутая дамоўленасьць наконт абмену палоннымі. На сярэдзіну студзеня ў казахстанскай сталіцы Астане рыхтавалася сустрэча па Ўкраіне ў «нармандзскім фармаце», ў складзе прэзыдэнтаў Расеі, Францыі і Ўкраіны і канцлера Нямеччыны. Аднак пасьля перамоваў 12 студзеня ў Бэрліне міністраў замежных справаў чатырох краінаў сустрэча ў вярхах у Астане была адкрадзеная ці скасаваная з прычыны няўзгодненасьці пазыцыяў бакоў.

Радыё Свабода
14 студзеня 2015, Менск