Як паведаміла супрацоўнік сайта Беларускай праваслаўнай царквы Таццяна Кузняцова, хрэсны ход прымеркаваны да свята Праабражэння Гасподня, якое адзначаецца 19 жніўня. Гара Грабарка з`яўляецца гістарычным цэнтрам праваслаўя ў Польшчы, паломніцтвы туды здзяйсняліся яшчэ ў мінулым стагоддзі. Цяперашні хрэсны ход ставіць на мэце духоўнае яднанне праваслаўных беларусаў і палякаў, адзначыла Кузняцова. У ім удзельнічаюць прыблізна 60 чалавек.

Мерапрыемства пачалося агульным набажэнствам у вёсцы Камянюкі, дзе размешчана адміністрацыя нацыянальнага парку "Белавежская пушча". Сёння ўдзельнікі хрэснага ходу накіруюцца ў вёску Ражкоўка. 16 жніўня яны пройдуць па маршруце Ражкоўка — Амяльянец — Вярховічы; 17-га — Вярховічы — Пагранічнае — Клюковічы. Апошні населены пункт размешчаны ўжо на тэрыторыі Польшчы.

Пасля прыбыцця 18 жніўня на гару Грабарку паломнікі плануюць правесці святочную ўсяночную. Затым у праграме — устанаўленне паломніцкага крыжа, таінства споведзі і Боская літургія.

Анастасія Янушэўская, БелаПАН
Мінск, 15 жніўня 2011

Ссылка на текущий документ: http://belarus.kz/aktueller/3-/687/8621

Текущая дата: 21.09.2024