Адзначаецца, што адпаведная пазіцыя была зацверджана ў ходзе анлайн-сустрэчы гэтай міжнароднай арганізацыі. У той жа час паведамляецца, што IHO плануе стварыць электронныя версіі карт, на якіх назвы мораў і акіянаў будуць пазначаныя нумарамі.

Каментуючы ў аўторак гэтую інфармацыю, кіраўнік МЗС Японіі Тасіміцу Матэгі на рэгулярнай прэс-канферэнцыі выказаў упэўненасць у тым, што IHO прыняла да ведама пазіцыю японскага боку па гэтым пытанні. «На папяровых картах застанецца назва „Японскае мора“, а на электронных будуць выкарыстоўвацца лічбы не толькі ў дачыненні да Японскага мора, але і ў дачыненні да іншых мораў. Думаю, што наша пазіцыя была прынятая да ўвагі», — адзначыў ён.

Паўднёвая Карэя і КНДР з пачатку 90-х гадоў мінулага стагоддзя патрабавалі перайменаваць Японскае мора ва «Усходняе». На думку Сеула і Пхеньяна, Токіа навязаў сусветнай супольнасці цяперашні тэрмін у рамках сваёй агрэсіўнай каланіяльнай палітыкі ў пачатку ХХ стагоддзя. У апошнія гады Сеул стаў схіляцца да таго, каб выкарыстоўваць на картах абедзве назвы.

Японія, у сваю чаргу, настойвае на тым, што назва «Японскае мора» была прынята яшчэ ў ХIХ стагоддзі па ініцыятыве еўрапейскіх картографаў. Гэты тэрмін таксама нязменна ўжываўся ў даведніках Міжнароднай гідраграфічнай арганізацыі, пачынаючы з іх першага выдання ў 1929 годзе. У 2012 годзе гэтая структура захавала назву «Японскае мора», нягледзячы на пратэсты Сеула.

Па дадзеных Yomiuri, канчатковы даклад па гэтым пытанні IHO апублікуе на працягу гэтага месяца.

Звязда, 17 лістапада 2020