Атунбаева зрабіла заяву, знаходзячыся ў панядзелак зь візытам у Джалал-Абадзе. Паводле кіраўніцы часовых кіргіскіх уладаў, урад ухваліў дэкрэт, што вызваляе гарады ад сплаты паасобных падаткаў. Атунбаева пры гэтым не ўдакладніла, пра якія падаткі ідзе гаворка і на які час уводзіцца іх адмена.

Паводле праваахоўчых органаў Кіргізстану, на сёньняшні дзень затрыманыя некалькі дзясяткаў падазраваных у арганізацыі і ўдзеле ў непарадках на поўдні краіны. У інтарэсах сьледзтва іх імёны не называюцца. Тым часам колькасьць загінулых у процістаяньні на поўдні Кіргізстану дасягнула 208 чалавек, звыш дзьвюх тысяч людзей былі параненыя.

Сёньня раніцаю падчас спэцапэрацыі кіргіскіх войскаў у Нарымане – узбэцкім прымесьці Ошу – загінулі два чалавекі, 17 былі параненыя. Вайскоўцы праводзілі рэйд з мэтаю разабраць пастаўленыя ўзбэкамі ў часе забурэньняў барыкады і канфіскаваць зброю. Паведамляецца, што салдаты змушаныя былі адкрыць агонь пасьля таго, як загінулыя аказалі супраціў, адмовіўшыся здаць зброю.

21.06.2010
Радыё Свабода

Ссылка на текущий документ: http://belarus.kz/aktueller/3-1/440/1121

Текущая дата: 23.12.2024