Стужка прыме ўдзел у 29-м Міжнародным кінафестывалі ў Марсэлі. У мінулым годзе фільм быў названы лепшай ігравой карцінай у нацыянальным конкурсе ММКФ "Лістапад" і стаў першай беларускай карцінай, якой удалося ўвайсці ў міжнародны конкурс кінадэбютаў "Маладосць на маршы".

Былы настаўнік англійскай мовы з маленькага горада раскідвае рэкламныя лістоўкі па паштовых скрынях. У яго ёсць жонка, сын, які вучыцца ў Мінску, незавершаны рамонт і святочны латарэйны білет, які на некалькі секунд дае яму шанц памарыць.

Фільм расказвае пра жыццё ў Мазыры, дзе насельніцтва складае 100 тыс. чалавек. Гэта горад, дзе нарадзілася Юлія і жывуць яе бацькі - галоўныя героі Анатоль і Аксана Шатуны.

Паводле слоў аўтара, бацькі згадзіліся дапамагчы ёй зняць гісторыю. Дыялогі яна спісвала са слоў сваіх бацькоў, сказаныя імі калісьці. Пачынаючы праект, дзяўчына не ведала, ці атрымаецца кіно са знятага матэрыялу.

Юлія выступіла адначасова сцэнарыстам, рэжысёрам і прадзюсарам фільма. Яна скончыла Беларускі дзяржаўны ўніверсітэт культуры і мастацтваў па спецыяльнасці "прыкладная культуралогія".

Жыве ў Мінску і працуе над новым кінапраектам, падрабязнасці пра які пакуль не раскрывае. "Заўтра" - яе першы поўнаметражны фільм. На ММКФ "Лістапад" ён таксама атрымаў прыз Гільдыі кіназнаўцаў і кінакрытыкаў Беларусі "За стварэнне дакладнага і выразнага вобраза сучаснага беларускага грамадства".

Юлія не ставіла сабе за мэту зрабіць жорсткую сацыяльную карціну, яна здымала пра тое, што ёй неабыякава. Аўтар лічыць, што атрымалася сумленна.



Міжнародны кінафестываль у Марсэлі пройдзе з 10 па 16 ліпеня. Ён прадставіць фільмы з усяго свету. Для многіх з іх паказ у конкурснай праграме стане сусветнай або міжнароднай прэм`ерай. Фільм "Заўтра" на фестывалі ў Марсэлі будзе прадстаўлены ў новай, пашыранай версіі.

Карціна прыме ўдзел адразу ў трох конкурсах: міжнародных, дэбютных фільмаў і асацыяцыі французскіх кінатэатраў GNCR. У Беларусі фільм выйдзе ў пракат у верасні.

21 чэрвеня 2018, Мінск
БЕЛТА