Аўтобусы МАЗ занялі другое месца на расійскім рынку ў мінулым месяцы, высветлілі эксперты агенцтва "Аўтастат".

У ліпені расійскія кампаніі і перавозчыкі набылі 904 новыя аўтобусы – гэта на 20% менш, чым у ліпені 2021-га. Аналітыкі палічылі, што 62% набытых аўтобусаў былі расійскай вытворчасці, 22,5% – беларускай, зусім невялікая доля прыпала на прадукцыю кітайскага аўтапрама.

Марачны рэйтынг па-ранейшаму ўзначальвае расійскі ПАЗ – у ліпені было набыта 303 экзэмпляры. Другое месца ўпэўнена заняў беларускі МАЗ, які прадаў 203 адзінкі – у 10 разоў больш, чым за той жа месяц мінулага года.

Трэцяе месца ў расійскага Volgabus (88 штук), зборачная вытворчасць якога знаходзіцца ў горадзе Волжскім. Чацвёртае – у кітайскай Yutong (81 экзэмпляр), якая таксама выпускае электробусы. Топ-5 рэйтынгу закрывае расійскі ЛіАЗ – 61 адзінка.

МАЗы ў лідарах.

У мадэльным рэйтынгу лідзіруе ПАЗ 3204, які ў 2006 годзе прыйшоў на змену класічнаму "пазіку" 3205. У ліпені гэтая мадэль разышлася тыражом у 149 адзінак. Другое месца заняў МАЗ 203: за мінулы месяц РФ набыла 105 аўтобусаў гэтай мадэлі. На трэцім месцы таксама МАЗ, але з сярэднім класам умяшчальнасці – 206-я мадэль. Такіх экзэмпляраў было прададзена 98.

Эксперты таксама высветлілі, што за студзень-ліпень гэтага года Расія купіла 7219 аўтобусаў – гэта на 1% больш, чым за аналагічны перыяд 2021-га. Пры гэтым 121 адзінку склалі электробусы.

Нагадаем, што нядаўна на Мінскі аўтамабільны завод здзейсніў рабочы візіт пасол РФ у Беларусі Барыс Грызлоў. Ён адзначыў, што прадукцыя прадпрыемства карыстаецца вялікім попытам у Расіі. Гэта датычыцца і грузавога, і пасажырскага транспарту, які працуе на дызелі, газаматорным паліве і электрычнай цязе.

Губернатары Санкт-Пецярбурга, Ленінградскай, Самарскай, Курскай абласцей, Пермскага краю і іншых расійскіх рэгіёнаў, наведваючы Беларусь, выказвалі пажаданні аб пастаўках пасажырскай і грузавой тэхнікі МАЗ. Адміністрацыя Санкт-Пецярбурга паведаміла аб закупцы каля 900 аўтобусаў беларускай вытворчасці да 1 ліпеня 2022 года.

Мінск, 13 жніўня 2022
Sputnik